Fuqarolarga pensiya tayinlash jarayoni soddalashtiriladi

Prezidentning “Fuqarolarga davlat pensiyasini tayinlash jarayonini soddalashtirish hamda pensiya va nafaqalarni fuqarolarga yetkazish tizimini takomillashtirish chora-tadbirlari to‘g‘risida”gi qarori loyihasi e’lon qilindi.

Qaror loyihasi mamlakatda pensionerlarni davlat tomonidan ijtimoiy qo‘llab-quvvatlashni yanada kuchaytirish, keksa yoshdagi fuqarolarga har tomonlama g‘amxo‘rlik qilish, shuningdek, fuqarolar davlat pensiya ta’minoti tizimini takomillashtirish va sohada mavjud muammolarni bartaraf etish hamda fuqarolarga pensiyalarni tayinlash uchun faqat pasport bilan murojaat qilishi kifoya bo‘ladigan tizimni yaratishni ta’minlash maqsadida Moliya vazirligi tomonidan ishlab chiqilgan.

Hujjat loyihasida fuqarolarga davlat pensiyalarini hisoblash uchun zarur ma’lumotlar elektron bazasini shakllantirish, hujjatlar yig‘ish jarayonini kompleks rivojlantirish orqali fuqarolar ovoragarchiliklarini bartaraf etish, pensiya va nafaqalar to‘lash tizimi samaradorligini oshirish hamda mazkur yo‘nalishda sog‘lom raqobat muhiti va zamonaviy standartlarni joriy etish nazarda tutilgan.

Hujjat loyihasini ishlab chiqishdan ko‘zlangan maqsad fuqarolarga davlat pensiyalarini tayinlash va to‘lashning avtomatlashtirilgan tizimini bosqichma-bosqich joriy etish, pensiyalarni tayinlash uchun faqat pasport bilan murojaat qilish kifoya bo‘ladigan tizimni yaratish, davlat pensiya ta’minoti borasida ko‘rsatilayotgan xizmatlar sifatini zamon talablariga muvofiqlashtirishdan iborat.

Amaldagi holatlar tahliliga ko‘ra, bugungi kunda pensiyalar tayinlashda 30 turdagi hujjatlar talab etiladi hamda mazkur ma’lumotlarni taqdim etishga mas’ul 14dan ortiq vazirlik va tashkilotlarda idoraviy axborot tizimlari, elektron resurs va ma’lumotlar bazalari mavjud emasligi qog‘oz shaklida ish yuritishdan voz kechish va hujjatlar yig‘ish jarayonini elektron shaklga o‘tkazishga to‘sqinlik qilib kelmoqda.

Qaror loyihasiga muvofiq quyidagi natijalarga erishiladi:

• pensiyalar hisoblash fuqarolarning “Yagona mehnat milliy tizimi” idoralararo dasturiy-apparat kompleksiga kiritilgan mehnat staji, oliy o‘quv yurtlaridagi kunduzgi ta’lim va harbiy xizmat davri to‘g‘risidagi elektron ma’lumotlari asosida amalga oshiriladi;
• Pensiya jamg‘armasi tomonidan moliyalashtiriladigan pensiyalar, ijtimoiy nafaqalar, kompensasiyalar va boshqa to‘lovlarni to‘lash Qoraqalpog‘iston Respublikasi, viloyatlar va Toshkent shahri bo‘yicha har uch yilda o‘tkaziladigan tender asosida tanlangan tijorat banki tomonidan amalga oshiriladi;
• pensiya va nafaqalar yetkazilgani uchun xizmat haqini to‘lash uchun fuqarolar har oylik pensiya va nafaqa miqdoriga qo‘shimcha 1 foiz ustama joriy qilinadi hamda to‘lovlarni naqd pulsiz shaklda olish yoki arzonroq xizmatdan foydalanish hisobiga iqtisod qilingan mablag‘ pensiya va nafaqa oluvchi ixtiyorida qoldiriladi;
• pensiya va nafaqa oluvchilarga O‘zbekiston hududida shaxsini tasdiqlaydigan, egasi shaxsiy biografik ma’lumotlari qayd etilgan, elektron tashuvchi qurilma (chip)ga ega bo‘lgan bank kartasi sifatida foydalanish imkoniyati mavjud maxsus pensiya kartasi joriy etiladi;
• davlat pensiya ta’minoti borasida ko‘rsatilayotgan xizmatlar sifatini zamon talablariga muvofiqlashtirish maqsadida Pensiya jamg‘armasi tashkiliy tuzilmasi qaytadan tanqidiy ko‘rib chiqiladi;
• Pensiya jamg‘armasi vaqtincha bo‘sh mablag‘larini tijorat banklari depozitlariga joylashtirishdan olingan daromadning yigirma foizi Pensiya jamg‘armasi xodimlarini ijtimoiy rivojlantirish va moddiy rag‘batlantirish jamg‘armasiga yo‘naltiriladi;
• har bir hududda bittadan Pensiya jamg‘armasi mavjud binolari negizida “Namunali Pensiya jamg‘armasi bo‘limi” tashkil etiladi.

Ushbu qaror qabul qilinishi bilan 2021 yilda qo‘shimcha mablag‘ talab etilmaydi hamda 2022 yildan keyin davlat byudjeti va Pensiya jamg‘armasidan o‘rtacha 180 mlrd so‘m qo‘shimcha mablag‘ talab etilishi aytilgan.