Farg‘onada singlisini urib, haqorat qilgan aka jazolandi

Oila muqaddas. Shaxs oilada tug‘ilib, shakllanadi va kamol topadi. Oilaning mustahkamligi nafaqat shu oila a’zolari uchun, balki butun jamiyat uchun muhimdir. Chunki, oiladagi barqarorlik va tinchlik jamiyatda ham o‘z aksini namoyon etadi. Biroq, jamiyatimizda shunday oilalar borki, unda “bir qorindan talashib tushgan” jigarbandlar o‘rtasida muntazam bo‘ladigan kelishmovchiliklar va janjallar oddiy holga aylangan.

Toshloq tuman ma’muriy sudi tomonidan 2020 yil 13 fevral kuni tuman IIB tomonidan O‘zbekiston Respublikasi MJtKning 41-moddasi (haqorat) va 52-moddasining 2-qismi (qasddan yengil tan jarohati yetkazish) bilan B.Tillaboyev nisbatan to‘plangan ma’muriy ish materiallari ko‘rib chiqildi.

Toshloq tuman sudining raisi A.Akramovning "ANIQ.UZ"ga ma’lum qilishicha, ish holatiga ko‘ra, B.Tillaboyev 2020 yil 24 yanvar kuni yashash xonadonida singlisi Z.Tillaboyeva bilan keksa onasini yumushlarini bajarish yuzasidan o‘zaro janjallashib ketib, uni uyatli so‘zlar bilan so‘kib, haqorat qilib, tanasining turli joylariga qo‘llari bilan urib, yengil tan jarohati yetkazgan.

Sud majlisida raislik qiluvchi taraflarni murosaga chaqirib, eng avvalo aka-singilni tan jarohati yetkazib janjallashishi uyatli holat ekanligini, bu holat kelgusida yomon oqibatlarga olib kelishi mumkinligini va ularni o‘zaro yarashib olishlari hamma uchun manfaatli ekanligini ta’kidlab, harchand aka-singilni yarashtirishga urinmasin taraflar yarashuv yo‘lini tanlashmadi. Ish bo‘yicha jabrlanuvchi Z.Tillaboyeva sud majlisida akasiga qat’iy jazo tayinlanishini va bu talabidan voz kechmasligini bildirib, moddiy va ma’naviy zararlar undirish masalasini ham hal qilib berishni so‘radi.

Sudning qaroriga ko‘ra, B.Tillaboyev O‘zbekiston Respublikasi MJtKning 41-moddasi va 52-moddasining 2-qismida nazarda tutilgan ma’muriy huquqbuzarliklarni sodir etgan deb topilib, unga MJtKning 34-moddasiga asosan uzil-kesil bazaviy hisoblash miqdorining o‘n baravari miqdorida 2 230 000 so‘m jarima jazosi tayinlandi. B.Tillaboyev jarimani bir kun davomida to‘liq to‘ladi.

Jabrlanuvchi tomonidan ish bo‘yicha yetkazilgan moddiy va ma’naviy zarar miqdorini tasdiqlovchi hujjatlar taqdim qilinmagani sababli, kelgusida ushbu hujjatlarni ilova qilgan holda tegishli fuqarolik ishlari bo‘yicha sudga murojaat qilish huquqi borligi tushuntirildi.

Shu o‘rinda, bir narsaga e’tiborni qaratsak. Aka-singil o‘rtasida kelishmovchilik kelib chiqishining sababi bu ularning onalarini holidan xabar olishdagi o‘zaro tushunmovchilik. Nahot, o‘z mehribonligi va rahmdilligi bilan dong taratgan millatimiz hozirga kelib o‘z onalarini boqish bilan bog‘liq munosabatlarda janjallashishsa, bir-birlariga qat’iy choralar tayinlanishini so‘rashsa?! Albatta, bu holat achinarli. Lekin, umid qilamizki bu holat kelgusida o‘z yakunini topib, taraflar murosa yo‘lini tanlaydilar.