Farg‘onada 1,5 milliard dollarlik xorijiy investisiya o‘zlashtiriladi
![Farg‘onada 1,5 milliard dollarlik xorijiy investisiya o‘zlashtiriladi Farg‘onada 1,5 milliard dollarlik xorijiy investisiya o‘zlashtiriladi](/photos/news/TYV4IJ8v7fmvHyv.jpeg)
Farg‘ona viloyatida o‘tgan yilda 1 milliard 330 million dollar miqdorida xorijiy investisiya o‘zlashtirildi. Investisiya kiritayotgan mamlakatlarning umumiy soni 23 taga yetib, bunda Xitoy, Rossiya, Janubiy Koreya davlatlari yetakchilik qildi.
Shuningdek, umumiy qiymati 332,5 million dollar bo‘lgan 28 ta xorijiy investisiya ishtirokidagi yirik loyiha ishga tushirildi, uch mingdan ortiq ish o‘rni yaratildi. Joriy yilda esa investisiyalar yanada faol jalb etiladi. Bu haqda Xalq deputatlari viloyat Kengashining sessiyasida viloyat hokimi o‘rinbosari Nuriddin Mamajonov viloyatda xorijiy investisiyalarni o‘zlashtirish, eksport va tashqi savdo geografiyasini rivojlantirish hamda hududiy investisiya loyihalarini amalga oshirish borasida 2023 yilda bajarilgan ishlar tahlili hamda bu borada 2024 yildagi chora-tadbirlar haqidagi axborotida ma’lum qildi.
Prezident Shavkat Mirziyoyev raisligida 18 yanvar kuni bo‘lib o‘tgan 2024 yilda investisiya, eksport va sanoat sohalaridagi ustuvor vazifalar muhokamasi yuzasidan videoselektor yig‘ilishidagi topshiriqlar asosida viloyatda aniq-chora tadbirlar ishlab chiqildi. Viloyatda 2024-2026 yillarda xorijiy investisiyalar ishtirokida amalga oshiriladigan umumiy qiymati 1,9 milliard dollar bo‘lgan 149 ta loyihaning manzilli ro‘yxati shakllantirilgan. Ushbu loyihalar doirasida xorijiy investisiyalar o‘zlashtirishni joriy yilda 1,5 milliard dollarga yetkaziladi.
-Bu ko‘rsatkichlarga erishishda 2 ta yo‘nalishda ishlar tashkil qilingan, -deydi viloyat hokimi o‘rinbosari.--Avvalo, xorijiy davlatlar bilan hamkorlik munosabatlari tizimli va tartibli mexanizm asosida yo‘lga qo‘yiladi. Ikkinchi yo‘nalishda, viloyat miqyosida va har bir shahar, tumanlarda investisiyalarni jalb qilishda jozibadorlikni oshirishga alohida ahamiyat qaratiladi.
Viloyatning eksport salohiyati hamda yangi ishga tushirilgan korxonalar imkoniyatlari o‘rganib chiqilgan holda maqsadli eksport ko‘rsatkichlari belgilab olingan. Joriy yilda 1 milliard 100 million dollarlik mahsulotlarni eksportga yo‘naltirish prognozi ishlab chiqildi.