Farg‘ona hayvonot bog‘idagi jirafa nobud bo‘ldi

Ijtimoiy tarmoqlarda Farg‘ona viloyatidagi hayvonot bog‘ida Maksim laqabli jirafa nobud bo‘lgani haqida xabarlar tarqaldi. Bu haqda Kun.uz hayvonot bog‘i direktori Tursunali Mamajonovga tayanib, xabar berdi.

«Jirafaning xonasi kichikroq bo‘ladi. Shuning uchun Maksimni tez-tez toza havoga, shamollatishga olib chiqib turardik. Lekin oxirgi paytlarda u ko‘p yotadigan bo‘lib qoldi, ovqat yeyishi ham o‘zgargandi. Shu holda oradan ikki, uch kun o‘tgach, 20 yanvar ertalab uning o‘lib qolganini ko‘rdik.

Jirafa shamollashdan o‘lganini faqatgina mutaxassislarni chaqirtirib, jasadini tekshirtirganda bildik. Go‘shtini esa hayvonlarga tarqatdik», — dedi Mamajonov.

Hayvonot bog‘i direktoriga ko‘ra, O‘zbekistondagi sovuq kunlar davomida boshqa mayda jonzotlar, xususan, bir necha qush ham nobud bo‘lgan, ammo yirik hayvonlarga zarar yetmagan.

Tursunali Mamajonov prezident Shavkat Mirziyoyevning Farg‘onaga tashrifida viloyat hayvonot bog‘ini kengaytirish va hayvonlar sonini ko‘paytirish uchun ham mablag‘ ajratilganini ma’lum qildi.

“Hayvonot bog‘ini kengaytirish va yangi hayvonlar olib kelish uchun 15 mlrd ajratiladigan bo‘ldi. Ammo qurilish qachon boshlanishi hali noaniq”, – dedi u.

Avvalroq “Xalq so‘zi” nashri Farg‘ona viloyatidagi hayvonot bog‘i muammosi, jumladan, «Farg‘ona hayvonot bog‘i» MCHJning infratuzilmasi va moddiy-texnik bazasiga oid muammolarga e’tibor qaratgan edi.

Shuningdek, Toshkent hayvonot bog‘idagi Alatau laqabli jirafa ham miya ishemiyasi sabab nobud bo‘lgandi.

U Toshkentga Olmaota hayvonot bog‘idan, sovg‘a sifatida yuborilgan bo‘lgan.