Evropa va Markaziy Osiyoda jazirama yiliga 400 ga yaqin bolaning hayotiga zomin bo‘lmoqda
Evropa va Markaziy Osiyo bo‘ylab havo haroratining ko‘tarilishi 2021 yilda taxminan 377 nafar bolaning hayotiga zomin bo‘ldi. UNICEF bu haqda 23 mamlakatga oid ma’lumotlarining yangi tahliliga asoslanib ma’lum qildi.
Evropa va Markaziy Osiyodagi jazirama sharoitida ushbu bolalarning yarmi hayotlarining birinchi yilida issiqlik bilan bog‘liq kasalliklardan vafot etgani aniqlandi. Bolalarning aksariyati yoz oylarida vafot etgan.
"Evropa va Markaziy Osiyodagi bolalarning qariyb yarmi yoki 92 million bola harorat global miqyosda eng tez ko‘tarilayotgan mintaqada jazirama to‘lqinlariga tez-tez duchor bo‘lmoqda. Haroratning ortib borishi bolalar, ayniqsa, o‘ta kichik yoshdagi bolalar salomatligiga jiddiy ta’sir ko‘rsatishi mumkin, hatto qisqa vaqt ichida ham. Bu asoratlar hayot uchun xavfli bo‘lishi mumkin, - dedi UNICEF'ning Yevropa va Markaziy Osiyo bo‘yicha mintaqaviy rahbari Regina De Dominikis.
Qayd etilishicha, issiqlik bolalar tug‘ilishidan oldin ham kuchli ta’sir ko‘rsata oladi va bu erta tug‘ilish, kam vaznlilik, o‘lik tug‘ilish va tug‘ma anomaliyalarga olib kelishi mumkin. Issiqlik stressi chaqaloqlar o‘limining bevosita sababi bo‘lib, chaqaloqlarning o‘sishiga ta’sir qilishi va bir qator bolalar kasalliklarini keltirib chiqarishi mumkin. Hisobotda, shuningdek, haddan tashqari issiqlik mintaqadagi bolalar va o‘smirlarning 32 ming yildan ortiq vaqtga teng sog‘lom turmush tarzini yo‘qotishiga sabab bo‘lganligi qayd etilgan.
