Eng yaxshi sahna asarlari bolalar uchun
Poytaxtimizda Xalqaro bolalar va yoshlar teatrlari assosiasiyasi a’zolarining uchrashuviga bag‘ishlangan tadbir bo‘lib o‘tmoqda. Mazkur tadbir O‘zbekiston davlat yosh tomoshabinlar teatri tashkil etilganining 90 yilligiga hamohang o‘tkazilayotgani e’tiborga molikdir.
O‘zbekiston Respublikasi madaniyat vazirining birinchi o‘rinbosari Ozodbek Nazarbekov, ASSITEJ O‘zbekiston ijodiy tuzilmasi rahbari, O‘zbekiston davlat yosh tomoshabinlar teatri direktori Zulfiya Hamrayeva va boshqalar bolalar uchun badiiy yetuk sahna asarlari yaratish teatr sohasi vakillari zimmasiga katta mas’uliyat yuklashini ta’kidladi.
Mamlakatimizda yosh avlod ma’naviyatini yuksaltirish, o‘g‘il-qizlarning badiiy-estetik didini to‘g‘ri shakllantirish, uni yuksaltirish masalalariga doimiy e’tibor qaratib kelinmoqda. Yurtimizda qabul qilingan bir qator qonun hujjatlari yoshlarga puxta ta’lim-tarbiya berish barobarida ularning ongu tafakkurini turli zararli va yot g‘oyalardan ishonchli himoyalashdek maqsadlarni ko‘zlashi bilan ahamiyatlidir.
Mamlakatimiz teatrlari safida faoliyati bolalar uchun mo‘ljallangan ijodiy jamoalar ham samarali ishlamoqda. O‘zbekiston davlat yosh tomoshabilar teatri ular orasida muhim va yetakchi o‘rin egallaydi. O‘tgan vaqt mabaynida mazkur teatrda bolalar uchun sahna asarlarini yaratishning milliy maktabi va an’analari shakllandi. Jamoada yaratilgan bir qator spektakllar yoshlarni vatanparvarlik, yurtga sadoqat ruhida tarbiyalashi bilan birga o‘g‘il-qizlarda oqni qoradan, yaxshini yomondan teran farqlay olish, to‘g‘rilik, mehnatsevarlik, halollik, kattalarga hurmat kabi fazilatlarning shakllanishida muhim omil bo‘lmoqda.
Jamoaning bir qator spektakllari xorijiy davlatlarda bo‘lib o‘tgan xalqaro festivallar, ko‘rik-tanlovlar, teatr bayramlarida muvaffaqiyatli namoyish etib kelinmoqda. Xalqaro bolalar va yoshlar teatrlari assosiyasiyasiga 2018 yil O‘zbekiston davlat yosh tomoshabinlar teatri negizida ASSITEJ O‘zbekiston nomi bilan mamlakatimizda faoliyat ko‘rsatayotgan barcha bolalar teatrlari a’zo bo‘ldi. Bu esa bolalar teatriga oid amaliy ishlarni yanada takomillashtirish, undan xalqaro teatr jamoatchiligini kengroq boxabar etishda muhim ahamiyat kasb etadi.
An’anaga ko‘ra, tashkilotga yangi a’zo bo‘lgan mamlakatda Xalqaro bolalar va yoshlar teatrlari assosiasiyasining navbatdagi yig‘ilishi o‘tkaziladi. Yurtimizda boshlangan ASSITEJ tadbiri doirasida spektakllar namoyishi, ularning muhokamasi va bolalar teatri oldida vujudga kelgan dolzarb muammolarni hal qilish uchun seminarlar, suhbatlar va ijodiy muloqotlar o‘tkazilishi ko‘zda tutilgan.
Tadbir davomida O‘zbekiston davlat yosh tomoshabinlar teatri, O‘zbekiston davlat yoshlar teatri va O‘zbekiston davlat qo‘g‘irchoq teatri tomonidan tayyorlangan bir qator spektakllar namoyish etiladi. Asosiy anjuman Bolalar spektaklarida tomoshabinlarning yoshlarini chegaralash tamoyillari mavzusini o‘z ichiga oladi.
Sir emaski, bugungi kunda bolalarning tafakkurini turli yot va zararli g‘oyalardan ishonchli himoyalash muhim o‘rin egallaydi. Bu esa teatr jamoalari, ayniqsa, yosh tomoshabinlar uchun mo‘ljallangan ijodiy jamoalar zimmasiga ham zalvorli vazifalarni yuklamoqda. Darhaqiqat, yurtimizning ertangi kuni yosh avlodga bog‘liq ekan, demakki, farzandlarimiz eng mukammal, barkamol va puxta sahna asarlariga munosib. Mazkur yo‘nalishdagi o‘zaro fikr va tajriba almashish istiqboldagi rejalar, amaliy sa’y-harakatlarni belgilab olish, xalqaro hamkorlikni mustahkamlash va kengaytirish, ijodiy safarlar uyushtirishda muhim ahamiyat kasb etadi.
ASSITEJ Osiyo 2019 konferensiyasida Xitoy, Janubiy Koreya, Yaponiya, Hindiston, Ozarbayjon, Belgiya, Gruziya, Isroil, Pokiston, Rossiya, Eron, Shri-Lanka, Belarus, Mo‘g‘iliston kabi davlatlardan vakillar ishtirok etmoqda.
Bolalar teatr jamoalarining bu kabi o‘zaro fikr va tajriba almashuvi g‘oyat muhimdir, deydi ASSITEJ tashkiloti koordinatori, san’atshunos Nataliya Raytarovskaya (Rossiya Federasiyasi). Negaki, yoshlar tarbiyasidek mas’uliyatli vazifa hozirda barcha mamlakatlar uchun dolzarbdir. Biz O‘zbekistonda madaniyat va san’at rivojiga katta e’tibor qaratilayotganining guvohi bo‘ldik.
Madaniy-ma’rifiy anjumanning ilk tadbiri O‘zbekiston davlat yosh tomoshabinlar teatri jamoasining ustoz adib G‘afur G‘ulom asari asosida sahnalashtirilgan Shum bola spektakli bilan boshlandi.
Manba: uza. uz
Matnda xatolik topsangiz, o‘sha xatoni belgilab, bizga jo‘nating (Ctrl + Enter)
