“Dekret” ta’tilidan ishga qaytganda, qanday yengilliklar beriladi?

— 3 nafar farzandim bor, kichigi 6 oylik. “Dekret” ta’tilidan ishga qaytsam, menga qanday yengilliklar beriladi? Ishdan ertaroq ketishim, shanba kunlari ishga bormasligim mumkinmi? Kadrlar bo‘limi boshlig‘i xususiy korxonalarda hech qanday imtiyoz yo‘q, dedi. Shu to‘g‘rimi?
Ismi sir tutildi

Ra’no Davronova, fuqarolik ishlari bo‘yicha Mirobod tumanlararo sudi sudyasi:
— Agar siz farzandingiz uch yoshga to‘lmasidan “dekret” ta’tilidan ishga qaytsangiz, sizga amaldagi Mehnat kodeksiga ko‘ra quyidagi yengilliklar beriladi:
Birinchidan: Mehnat kodeksining 228-1-moddasiga ko‘ra, uch yoshga to‘lmagan bolalari bor, byudjet hisobidan moliyaviy jihatdan ta’minlanadigan tashkilotlar va muassasalarda ishlayotgan ayollarning ish vaqtining qisqartirilgan muddatiga bo‘lgan huquqi mavjud. Ya’ni, uch yoshga to‘lmagan bolalari bor, byudjet hisobidan moliyaviy jihatdan ta’minlanadigan muassasalar va tashkilotlarda ishlayotgan ayollarga ish vaqtining haftasiga o‘ttiz besh soatdan oshmaydigan qisqartirilgan muddati belgilanadi. Bunda ish vaqtining qisqartirilgan muddati chog‘ida ushbu moddaning birinchi qismida ko‘rsatilgan ayollar mehnatiga haq har kungi to‘liq ish muddati chog‘ida tegishli toifadagi xodimlar uchun belgilangan miqdorda to‘lanadi.
Ikkinchidan: Mehnat kodeksining 236-moddaga nazar tashlaydigan bo‘lsak, ikki yoshga to‘lmagan bolasi bor ayollarga, dam olish va ovqatlanish uchun beriladigan tanaffusdan tashqari, bolani ovqatlantirish uchun qo‘shimcha tanaffuslar ham beriladi. Bu tanaffuslar kamida har uch soatda bir marta har biri o‘ttiz minutdan kam bo‘lmagan muddat bilan beriladi. Ikki yoshga to‘lmagan ikki va undan ortiq bolasi bo‘lgan taqdirda, tanaffusning muddati kamida bir soat qilib belgilanadi. Bolani ovqatlantirish uchun beriladigan tanaffuslar ish vaqtiga kiritiladi va o‘rtacha oylik ish haqi hisobi bo‘yicha haq to‘lanadi. Bolasi bor ayolning xohishiga ko‘ra, bolani ovqatlantirish uchun beriladigan tanaffuslar dam olish va ovqatlanish uchun belgilangan tanaffusga qo‘shib berilishi yoki umumlashtirilib, ish kunining (ish smenasining) boshiga yoki oxiriga ko‘chirilib, ish kuni (ish smenasi) shunga yarasha qisqartirilishi mumkin. Bu tanaffuslarning aniq muddati va ularni berish tartibi jamoa shartnomasida, agar u tuzilmagan bo‘lsa, ish beruvchi va kasaba uyushmasi qo‘mitasi yoki xodimlarning boshqa vakillik organi bilan kelishib belgilab qo‘yiladi.
Shanba kunlari ishga kelmasligingiz masalasi esa mehnat shartnomasiga asosan, ish beruvchi korxona tomonidan belgilangan ish xaftasi kunlariga qarab belgilanadi (besh kunlik yoki olti kunlik ish haftasi nazarda tutilmoqda).
Shuningdek, xususiy korxonalarda hech qanday imtiyoz yo‘q, deyish esa noto‘g‘ri, chunki hodim davlat tashkiloti yoki xususiy korxonada ishlashidan qat’iy nazar Mehnat qokunchiligi butun O‘zbekiston Respublikasi hududida amal qiladi.