Budapesht shahrida konsullik-huquqiy sohadagi O‘zbekiston-Vengriya maslahatlashuvlarining birinchi davrasi bo‘lib o‘tdi
Kecha Budapesht shahrida konsullik-huquqiy sohadagi O‘zbekiston-Vengriya maslahatlashuvlarining birinchi davrasi bo‘lib o‘tdi, deb xabar qilmoqda "Dunyo" AA muxbiri.
O‘zbekiston delegasiyasiga TIVning Konsullik-huquqiy departamenti boshlig‘i o‘rinbosari Rustam Nazarov, Vengriya tomoniga Tashqi ishlar va savdo vazirligi Konsullik departamenti direktori Balazs Farkash boshchilik qildi.
Tadbirning ochilishida Vengriya Tashqi ishlar va savdo vazirligi davlat kotibi o‘rinbosari Adam Stifter va O‘zbekiston elchisi Oybek Shaxavdinov ishtirokchilarni qutladilar.
Maslahatlashuvlar davomida tomonlar konsullik sohasidagi ikki tomonlama hamkorlikni chuqurlashtirish, xususan, fuqarolarning o‘zaro sayohatlarini osonlashtirish, konsullik masalalari bo‘yicha huquqiy bazani yanada kengaytirish, shuningdek, ikki davlat hududidagi vatandoshlar va yuridik shaxslar huquq va manfaatlarini himoya qilish masalalarini muhokama qildilar.
Tadbir davomida O‘zbekiston tomoni mamlakatimizda konsullik-huquqiy sohani takomillashtirish, xususan, O‘zbekiston fuqarolariga xorijdagi konsullik xizmatlarini ko‘rsatish bo‘yicha TIV faoliyatiga zamonaviy axborot-kommunikasiya texnologiyalarini joriy etish va chet el fuqarolarining O‘zbekistonda bo‘lishi, konsullik xizmatlarini bosqichma-bosqich elektron formatga o‘tkazish, viza rejimini liberallashtirish, shuningdek, O‘zbekistonning xorijiy muassasalari tomonidan haydovchilik guvohnomalari, elektron raqamli imzo va PINFL taqdim etilishini boshlash bo‘yicha amalga oshirilayotgan chora-tadbirlar haqida batafsil ma’lumot berdi.
Tomonlar ikki davlat tashqi ishlar vazirliklari o‘rtasida ushbu konsullik maslahatlashuvlari ilk bor o‘tkazilayotgani va bu ikki davlat idoralari o‘rtasida hamkorlikni mustahkamlash hamda yaqin aloqalarni o‘rnatishga xizmat qilishini ta’kidladilar.
Muzokaralar yakunlari bo‘yicha tomonlar konsullik masalalari bo‘yicha hamkorlikni muntazam ravishda yanada mustahkamlash va kengaytirishga tayyor ekanliklarini tasdiqladilar.
Shuningdek, tomonlar 2025 yilda O‘zbekistonda konsullik xizmatlari rahbarlari darajasida konsullik maslahatlashuvlarining ikkinchi davrasini o‘tkazish to‘g‘risida kelishib oldilar.
