Dunyo bo‘ylab vatandoshlar uchun iftorlik tadbirlari tashkil etilmoqda

Ramazon – mehr-shafqat, bag‘rikenglik va saxovat oyi doirasida xorijdagi vatandoshlarni qo‘llab-quvvatlash, ularga milliy-diniy qadriyatlarni yetkazish maqsadida ko‘plab davlatlarda turli madaniy-ma’rifiy tadbirlar tashkil etilib, iftorlik dasturxonlari yozilmoqda, deb xabar bermoqda “Dunyo” AA muxbiri.

Tashqi ishlar vazirligi ma’lumotiga ko‘ra, shu yilning fevral–mart oylari davomida Janubiy Koreya (Seul, Inchon, Tegu), Turkiya (Istanbul, Anqara), Saudiya Arabistoni (Makka, Madina), Misr, Malayziya, AQSH, Kanada, Rossiya va boshqa bir qator davlatlarning 20 dan ortiq yirik shaharlarida davlat va vatandoshlar homiyligida iftorliklar tashkil etiladi. Xususan, AQShning Nyu-York, Nyu-Jersi, Illinoys kabi shtatlarida o‘ndan ortiq iftorlik marosimi o‘tkazilishi belgilangan.

Mazkur xayrli tashabbuslar doirasidagi tadbirlar allaqachon boshlangan. Jumladan, Janubiy Koreyaning Seul, Inchon va Tegu kabi yirik shaharlarida, Rossiyaning Novosibirsk hamda Ozarbayjonning Boku shaharlarida vatandoshlar ishtirokida ma’rifiy uchrashuvlar o‘tkazilib, iftorliklar dasturxonlari tashkil etildi.

Davlatimizning xorijdagi vatandoshlarga nisbatan g‘amxo‘rlik va ijtimoiy himoya ifodasi sifatida, O‘zbekiston musulmonlari idorasining bir guruh ulamolari, imom-xatiblari va mohir qorilaridan iborat delegasiya ham ayni kunlarda xorijiy mamlakatlarda bo‘lib turibdi. Diniy soha vakillari ishtirokida tashkil etilayotgan ma’rifiy suhbatlarning bosh mavzusi – islom dinining asl insonparvarlik mohiyati, milliy qadriyatlarga sodiqlik va turli buzg‘unchi g‘oyalardan ogohlikdir. Bu uchrashuvlar nafaqat diniy marosim, balki xorijdagi yoshlarni vatanparvarlik ruhida tarbiyalashning muhim vositasi bo‘lib xizmat qilmoqda.

O‘tkazilayotgan tadbirlarning asosiy maqsadi – murakkab sharoitda mehnat qilayotgan migrantlar, og‘ir hayotiy vaziyatga tushib qolgan fuqarolar va xorijda ta’lim olayotgan talabalarni qo‘llab-quvvatlashdan iborat bo‘layapti. Bu Yangi O‘zbekistonning “inson qadri uchun” tamoyili davlat chegaralari bilan cheklanib qolmasligini yana bir bor isbotlaydi. Marosimlarda Qur’on tilovat qilinib, yurtimiz tinchligi va ravnaqi uchun duolar qilinmoqda.

Tadbirlarning aniq manzili va vaqti haqidagi rasmiy ma’lumotlar O‘zbekistonning tegishli xorijiy mamlakatlardagi elchixonalari va konsullik idoralarining rasmiy sahifalari orqali e’lon qilib boriladi.

Xulosa o‘rnida aytish joizki, xorijda tashkil etilayotgan bu kabi madaniy-ma’rifiy tadbirlar yurtdoshlar qalbida Vatanga bo‘lgan sadoqat va shukronalik tuyg‘usini yanada kuchaytirmoqda. O‘zga yurtda o‘qilgan taroveh namozlari va vatandoshlar bilan baham ko‘rilgan milliy taomlarimiz har bir yurtdoshimizga O‘zbekistonning doimiy e’tibori va taftini his qilish imkonini bermoqda.