Заҳарланиш воқеаси: Макрон ва Меркел Навалнийга ёрдам кўрсатишга тайёр, аммо...

АҚШ Россия мухолифати етакчиси Алексей Навалнийнинг касалхонага ётқизилгани ҳақидаги хабарларни ўрганмоқда, дея хабар беради Reuters агентлиги АҚШ президенти Доналд Трампга таяниб. Жаноб Трамп АҚШ давлат котиби Майк Помпеонинг вазият ҳақида ҳисоботини кутаётганини айтди, деб ёзади The Washington Times газетаси. 

Германия канцлери Ангела Меркелнинг айтишича, Алексей Навалнийнинг касалхонага ётқизилиши билан боғлиқ вазият имкон қадар тезроқ аниқланиши керак. Меркел хоним билан қўшма конференцияда қатнашган Франция президенти Эммануэл Макрон жаноб Навалнийга даволаниш, бошпана ёки ҳимоя билан таъминлашга тайёрлигини маълум қилди. Германия канцлери ҳам тиббий ёрдам кўрсатишга тайёрлигини маълум қилди, деб хабар бермоқда Reuters.

Алексей Навальний тарафдорларининг айтишича, Кремль унинг Германияга даволаниш учун олиб борилишига тўсқинлик қилмоқда. Навальнийни қўллаб-қувватловчилар Сибирдаги шифохонада етарлича тиббий жиҳозлар мавжуд эмаслигини ва бу Навальнийнинг ҳаётига ўлим хавф солишига олиб келганини айтишмоқда.

20 август, пайшанба куни эрталаб Алексей Навалний Томскдан Москвага парвоз пайтида самолётда соғлиғи ёмонлашди. Самолёт Омскка фавқулодда қўнган, жаноб Навалний касалхонага ётқизилган. Навалнийнинг вакили Кира Ярмишнинг айтишича, сиёсатчи "чойга қўшиб берилган нарсадан заҳарланган". Жаноб Навалний табиий кома ҳолатида. Шифокорлар ташхисни аниқлай олишмади, аммо улар инсулт, ўткир миокард инфаркти бўлиши мумкинлигини истисно қилди.