Ўзбекистон автомобил бозорида ўсиш бироз секинлашганига қарамай, барқарор ўсишда давом этмоқда. Ой давомида сотувлар 2,4%га ўсди ва энг сезиларли ўсиш электромобиллар иккиламчи бозорида қайд этилди.

Иқтисодий тадқиқотлар ва ислоҳотлар маркази томонидан Ўзбекистон автомобил бозоридаги вазият таҳлил қилинди.

Август ойда автотранспорт воситаларини сотиш 2,4%га ўсиб, 148 мингтага етди. Ўтган йилнинг август ойига нисбатан сотувлар сони 24%га ортган.

Енгил автомобиллар

Август ойида сотилган енгил автомобилларнинг умумий сони 135 мингтадан ошиб, ўтган ойга нисбатан 2,3%га ўсди.

Нисбатан юқори ўсиш Хоразм – 17%, Жиззах – 12% ва Сирдарё – 11% вилоятларида қайд этилди.

Умуман олганда, енгил автомобиллар савдоси ўтган йилнинг август ойига нисбатан 24%га ўсди.

Бирламчи автомобил бозоридаги вазият

Август ойида жами 37,7 мингта янги енгил автомобиллар сотилиб, автомобил сотуви ўтган ойга нисбатан 9%га ўсган.

Ўтган йилнинг август ойига нисбатан бирламчи енгил автомобиллар бозорида ўсиш 2 баравардан кўпроқни ташкил этди.

Маҳаллий ишлаб чиқарилган янги енгил автомобиллари сегментида сотувлар 32,6 мингтани ташкил этди (июль ойида 29,6 мингта).

Хорижда ишлаб чиқарилган енгил автомобиллар бозори

Август ойида хорижда ишлаб чиқарилган 5,4 мингта янги енгил автомобиллар сотилиб, июль ойидаги кўрсаткичдан 8,7%га кўпайган.

Иккиламчи автомобил бозоридаги вазият

Иккиламчи бозорда енгил автомобиллар савдоси бироз пасайди. Ой давомида 97,5 мингта енгил автомобиллар сотилиб, ўтган ойга нисбатан 0,1%га пасайган. Шу билан бирга, ўтган йилнинг август ойига нисбатан сотув миқдори 7%га ўсган.

Иккиламчи автомобил бозорида сотувларнинг пасайиши UzAuto Motors томонидан Cobalt, Lacetti, Labo ва Damas автомобиллари учун шартномаларнинг тикланиши билан боғлиқ (шу йилнинг август ойидан бошлаб 51 мингга яқин автомобил учун шартнома тузилган, бу компаниянинг 2023 йил охиригача ишлаб чиқариш режаларига мос келади).

Электромобиллар бозори

Август ойида енгил электромобиллар сотуви 3,7 мингтадан ошиб, июль ойига нисбатан 38%га кўпайган.

Энг кўп сотилган электромобиллар Тошкент шаҳрида – 2,8 мингта, Тошкент – 250 та ва Фарғона – 139 та вилоятларида қайд этилди.

Ўтган йилнинг шу даврига нисбатан электромобиллар сотуви 5 бараварга ошган.

Бирламчи бозорда электромобиллар сотуви 3,2 мингтани ташкил этди ва ўтган ойга нисбатан 35%га ўсди. Сотиш кўрсаткичи ўтган йилнинг шу даврига нисбатан 7,3 бараварга кўпайган.

Сезиларли ўсиш электромобилларнинг иккиламчи бозорида қайд этилди. Ой давомида сотувлар 56%га ўсди ва 497 донани ташкил этди. Сотиш кўрсаткичи 2022 йил август ойига нисбатан 89%га ошган.