Юртимиз мезбонлик қиладиган U-20 Жаҳон чемпионатига тайёргарлик кўришга оид президент қарори қабул қилинди

Президент Шавкат Мирзиёев томонидан “2027-йилги футбол бўйича U-20 Жаҳон чемпионатига тайёргарлик кўриш ва уни ўтказиш чора-тадбирлари тўғрисида”ги қарор қабул қилинди.

Қарорга мувофиқ, 2027-йилда Ўзбекистон ва Озарбайжонда бўлиб ўтадиган футбол бўйича U-20 Жаҳон чемпионатини юқори савияда ташкил этиш устувор вазифа этиб белгиланди. Хусусан, мусобақага пухта тайёргарлик кўриш, FIFA талабларига мос инфратузилмани яратиш, иштирокчилар ва мухлислар учун қулай шароитлар таъминлаш ҳамда чемпионат орқали мамлакатнинг халқаро нуфузини ошириш назарда тутилган.

Қарорда 2025 йил 2 октябрь куни FIFA Кенгаши томонидан U-20 Жаҳон чемпионатини Ўзбекистон ва Озарбайжонда ўтказиш тўғрисида қарор қабул қилингани маълумот учун қабул қилинди. Шунингдек, мусобақага тайёргарлик кўриш ва уни ўтказиш бўйича Ташкилий қўмита таркиби ҳамда чора-тадбирлар дастури тасдиқланди.

Ташкилий қўмитага Жаҳон чемпионатини ўтказиш жараёнида масъул давлат органлари фаолиятини мувофиқлаштириш, стадионлар ва бошқа объектларни FIFA талабларига мос ҳолда жиҳозлаш, иштирокчиларнинг келиб-кетиши, виза, транспорт, тиббий хизмат ва волонтёрлик масалаларини ташкил этиш вазифалари юклатилди. Шунингдек, чемпионат ҳудудларида узлуксиз ва муқобил электр энергияси билан таъминлаш, стадионлар, машғулот майдонлари ҳамда меҳмонхоналарни тайёр ҳолатга келтириш белгиланди.

Қарорга биноан, мусобақа доирасидаги харажатлар ва уларни молиялаштириш манбалари алоҳида илова билан тасдиқланди. Аккредитациядан ўтган шахслар ва ўйин чипталари мавжуд мухлислар учун жамоат транспортидан, жумладан автобус ва метродан бепул фойдаланиш имкониятлари яратилади.

Шу билан бирга, Тошкент шаҳрида FIFAнинг Марказий Осиё мамлакатлари учун минтақавий офисини очишга розилик берилди. Минтақавий офис Ўзбекистон футбол ассоциацияси биносида жойлаштирилади ва унинг фаолияти асосан FIFA маблағлари ҳисобидан молиялаштирилади.

Қарорда Ўзбекистон футбол ассоциацияси, Спорт вазирлиги, Энергетика вазирлиги ҳамда бошқа масъул идоралар зиммасига Жаҳон чемпионатига тайёргарлик кўриш, медиа ёритувини таъминлаш, инфратузилма ва энергетика масалаларини ҳал этиш бўйича аниқ вазифалар юклатилди.

Мазкур қарорнинг ижросини таъминлаш ва назорат қилиш Бош вазир ҳамда Президентнинг спорт бўйича вакилига юклатилди.

Ўзбекистон ва Озарбайжон 2027-йилги U-20 жаҳон чемпионатига мезбонлик қилади. 2025 йил 2 октябрь куни FIFA Кенгашининг навбатдаги йиғилиши бўлиб ўтган. Унда кун тартибидаги долзарб масалалар қаторида 2027-йилда 20 ёшгача бўлган футболчилар ўртасида ўтказиладиган Жаҳон чемпионати мезбон мамлакатлари ҳам расман эълон қилинган.

Қарорга мувофиқ, 2027-йилги U-20 Жаҳон чемпионати Ўзбекистон ва Озарбайжон ҳудудида бўлиб ўтади. Ушбу мусобақа FIFA томонидан ташкил этиладиган миллий терма жамоалар ўртасидаги Жаҳон чемпионатидан кейинги энг нуфузли турнир ҳисобланади.