Украина махсус операция бошлангандан бери қанча техникасини йўқотганини илк марта очиқлади
Украина армиясининг ҳарбий техникадаги йўқотишлари 50 фоизга етади. Бу ҳақда жорий йилнинг 15 июнь куни Украина қуруқликдаги қўшинлари моддий-техника таъминоти қўмондони генерал Владимир Карпенко Американинг “National Defense Magazine”га берган интервюсида маълум қилди.
“Бугунги кунда бизда фаол ҳарбий ҳаракатлар натижасида 30-40 фоиз, баъзан эса 50 фоизгача техника йўқотишларга учрадик. Шундай қилиб, биз тахминан 50 фоизини йўқотдик. Тахминан 1300 та пиёда жанговар техникаси, 400 та танк, 700 та артиллерия тизими йўқотилди”, деган Карпенко.
Бундай шароитда Украинага етказиб бериладиган қуроллар унинг эҳтиёжининг атиги 10-15 фоизини қоплайди. Украина Қуролли Кучлари артиллерия, зирҳли техника, ҳаво ҳужумидан мудофаа тизимлари ва кўплаб ракета тизимларига муҳтож, дея қўшимча қилган Карпенко.
Унинг сўзларига кўра, фаол жанглар кетаётган фронт чизиғини самарали қамраб олиш учун Украина 40 та бригадани тўлиқ жиҳозлаши керак. Бунинг учун жами тўрт минг пиёда жанговар техникаси, 1200 та танк ва 2100 дан ортиқ артиллерия тизимлари керак бўлади.
Украина ОАВнинг ёзишича, украин армияси Россия ҳужуми бошланганидан бери йўқотилган техникалар ҳақида илк бор маълумот берди.
