Трамп режалари ҳақида 15 дақиқа олдин ким билган?

Financial Times маълумотига кўра, Дональд Трампнинг Эрон билан “самарали музокаралар” ҳақидаги пости эълон қилинишидан тахминан 15 дақиқа олдин нефт бозорида $580 млнлик битимлар амалга оширилган. Таҳлил Bloomberg маълумотларига асосланган.

23 март куни Нью-Йорк вақти билан 6:49–6:50 оралиғида Brent ва WTI нефть фьючерслари бўйича тахминан 6200 та операция қайд этилган. Айниқса, 6:50 га 27 сония қолганда савдо ҳажми кескин ошган. Шу ортидан S&P 500 фьючерслари ҳам кўтарилган. Трампнинг пости эса 7:04 да чиқиб, энергия ресурслари нархининг тушиши ва Европа акцияларининг ўсишига олиб келган.

Бозор иштирокчилари бу ҳолатни шубҳали деб баҳоламоқда. Айрим мутахассислар сабаб-оқибат боғлиқлигини исботлаш қийинлигини айтса-да, постигача фьючерсларни “агрессив сотган” ким бўлгани ҳақида саволлар туғилмоқда. Бошқа манбалар эса бундай ҳаракатлар одатий эмаслигини ва кимдир катта фойда кўрганини таъкидлаган. Айрим хедж-фондлар бу каби ҳолатлар сўнгги ойларда бир неча бор кузатилганини маълум қилди.

Оқ уй айбловларни рад этди. Маъмурият вакили Куш Десаи ҳукумат фақат америкаликлар манфаатини кўзлашини ва инсайдер маълумотлардан ноқонуний фойдаланишга йўл қўйилмаслигини билдирди.

Шу билан бирга, Эрон парламенти спикери Мохаммад Багер Галибаф музокаралар бўлганини инкор этиб, бу каби хабарлар молиявий ва нефт бозорларини манипуляция қилиш учун тарқатилаётганини айтди.

Мазкур можаро глобал нефть инқирози фонида кучаймоқда. КСИР Ҳурмуз бўғози устидан тўлиқ назорат ўрнатганини маълум қилган. Янги олий раҳбар Можтаба Ҳаменеи бўғоз блокадасидан босим воситаси сифатида фойдаланиш ниятини билдирган.

Таъминот тақчиллигига жавобан АҚШ Россияга нисбатан айрим санкцияларни юмшатиб, танкерларда жойлашган тахминан 140 млн баррель Эрон нефтини сотишга рухсат берган.