Тошкентда биринчи жамоатчилик яшил парки барпо этилмоқда

Бугун, 19-март куни Экология, атроф-муҳитни муҳофаза қилиш ва иқлим ўзгариши вазирлиги, “Замин” халқаро жамоат фонди ҳамкорлигида пойтахтимиздаги биринчи жамоатчилик яшил паркида дарахт кўчатлари экиш тадбири бўлиб ўтди.

Пойтахтни кўкаламзорлаштириш, ёшларнинг экологик маданиятини оширишга қаратилган тадбирда давлат идоралари, жамоат ташкилотлари вакиллари, экология фаоллари, олий таълим муассасалари талабалари, умумтаълим мактаблари ўқувчилари иштирок этди. Акция давомида 300 туп дарахт кўчатлари экилди.

Экология вазири Азиз Абдуҳакимов жамоат паркида аҳоли дам олиши учун барча қулайликлар яратилаётганлигини таъкидлади.

“Биринчидан, ҳудудда ҳеч қандай аттрацион ёки озиқ-овқат шахобчалари бўлмайди, шовқиндан холи паркка айлантирилади. Иккинчидан, илк бор 100 турдаги атиргул экилмоқда ва ўзига хос атиргул боғи барпо қилинмоқда. Учинчидан, паркда табиий кўл яратилади. Тўртинчидан, қушлар учун инлар қурилади. Бешинчидан, жамоат паркининг ҳамма йўлаклари тошлардан, ўриндиқлари эса қуриган дарахтлардан, яъни тўлиқ табиий материаллардан қилинади. Олтинчидан, ҳудудда йил давомида кетма-кет гуллайдиган ўсимликлар экилади ва бу паркнинг доимий кўркам қиёфа касб этишига хизмат қилади. Еттинчидан, жамоат паркига кириш мутлақо бепул ва истаган киши ҳордиқ чиқариши мумкин бўлади. Саккизинчидан, паркда бирорта ҳам чиқинди қутилари ўрнатилмайди, фақат паркка киришда ва чиқишда қўйилади. Яъни дам олувчилар чиқиндиларини ўзлари билан олиб кетишади, жамоат паркига чиқинди ташлаш қатъий тақиқланади, бу эса ҳудуднинг экологик тоза масканга айланишини таъминлайди. Тўққизинчидан, парк тўлиқ Европа, жумладан, Япония тажрибаси асосида барпо қилинмоқда. Ўнинчидан, паркда фақат маҳаллий, ўзимизнинг иқлимга мос дарахтлар экилмоқда”, — деди Азиз Абдуҳакимов.

Маълумот учун, "Oxygen park" биринчи яшил жамоат парки лойиҳаси “Яшил макон” умуммиллий лойиҳаси доирасида амалга оширилмоқда. Тошкент шаҳри аҳолиси ва меҳмонлар учун қулай экологик муҳит ва маданий ҳордиқ чиқариши учун қулай шароит яратиш ҳамда шаҳарнинг яшиллик даражасини ошириш мақсад қилинган. Ҳудуд майдони 7,5 гектарга тенг.

Хиёбонда 1200 тупдан ортиқ дарахт ва 23 000 туп бута, хусусан, 208 туп шумтол, 160 туп заранг, 190 туп бандли эман, 137 туп йирик баргли жўка, 46 туп лола дарахти, 177 туп қрим қарағайи, 52 туп аризон кипариси, 23 туп садақайрағоч, 38 туп мажнунтол, 6 туп Канада багранниги, 6 туп магнолия, 50 туп япон сафораси, 6 туп зарафшон арчаси, 100 туп узун баргли (оддий) арча, 50 туп оқ қайин ва 20 туп чинор кўчатлари экиш мақсад қилинган.

Шунингдек, 9 туп писсарда олхўриси, 189 туп Сурия атиргули, 2370 туп лаванда, 2120 туп фотиния, 260 туп шарқ туяси, 26 туп ҳинд сирени, 400 туп форзиция, 600 туп магония, 200 туп штамб атиргули ва 17460 туп ҳар хил турдаги атиргул кўчатлари экилади.

Дарахт ва бута кўчатларини парваришлаш учун сунъий сув ҳавзаси ҳамда қуёш энергиясидан қувватланадиган ер ости қудуғи ташкил этилади.

Жамоат паркининг очилиш маросими баҳор мавсумининг кейинги ойларига мўлжалланмоқда.