Сув текин эмас, деган ғояни аҳолига чуқур сингдириш лозим – Президент

Бугун, 17-ноябр куни Президент Шавкат Мирзиёев раислигида Термиз шаҳрида Сурхондарё вилоятини ижтимоий-иқтисодий ривожлантириш юзасидан йиғилиш ўтказилмоқда. Унда давлат раҳбари сув масаласига ҳам тўхталди.

Унга кўра, яқин йигирма йилда Амударё ва Сирдарё оқими 15 фоиз камайиши кутилмоқда. Сув тежовчи технологиялар кенгайтириляпти, лекин бу етарли эмас. Сурхондарёда 80 фоиз ерлар насос орқали суғорилади. Бироқ 52 та насоснинг хизмат муддати 40 йилдан ошган.

Оқибатда, сув таннархи 2 баробар қимматга тушяпти, йилига 20 миллион киловатт соат электр беҳуда сарфланяпти, яна 20 минг гектарда сув таъминоти ёмонлашган. Шунингдек, 1 минг 700 километр суғориш тармоғининг ярми тупроқ ўзанли бўлгани учун 35 фоиз сув йўқотиляпти.

“Сув текин эмас”, деган ғояни аҳолига чуқур сингдириш, уни маҳалла фаоллари, нуронийлар, зиёлилар ва кенг жамоатчилик билан бирга кундалик турмуш қоидасига айлантириш асосий вазифа бўлиши лозим”, - деди Президент.

Мутасаддиларга 47 та канални бетонлаш бўйича икки йиллик дастур ишлаб чиқиш, сув йўқотилиши кўп бўлган 6 та канални таъмирлаш, келгуси йилда “Шеробод магистрал” каналини таъмирлашга 60 миллион доллар жалб этиб, 90 минг гектар ерларни тиклаш бўйича топшириқ берилди.