Ҳиндистонда 229 киши қурбон бўлган авиаҳалокатга доир дастлабки хулосалар олинди

Жорий йил 12 июн куни Лондонга учаётган Boeing 787 самолёти Аҳмадободда ҳалокатга учраган ва бортида бўлган 229 нафар йўловчи ҳалок бўлиб, бир киши тирик қолган эди.

Ҳиндистон ҳаво ҳодисаларини текшириш бюроси шанба куни эълон қилган дастлабки ҳисоботга кўра, Air India самолётининг ёнилғи узатувчи калитлари ҳалокатдан олдин ўчирилган.

Boeing 787 Dreamliner ҳавога кўтарилиб, унинг тезлиги 333,4 км/соатга етганида тўсатдан 1-двигател ва 2-двигателларнинг ёнилғи узатиш калитлари бирин-кетин «RUN» (қўшиш) ҳолатидан «CUTOFF» (ўчириш) ҳолатига ўтиб қолган. Бу учиш-қўниш йўлагидан чиққанидан сўнг бир неча дақиқада двигателнинг ҳавога кўтарилиш кучини кесиб қўйган.

Дарҳол иккала калит ҳам «RUN» ҳолатига қайтарилган. Учувчилардан бири «MAYDAY MAYDAY MAYDAY» (халқаро хавотир сигнали) сигналини уузатган. Бироқ, аллақачон етарли баландликни йўқотган самолёт қувватни қайта тиклай олмаган.

Самолёт ҳалокатга учрагунга қадар парвоз тахминан 30 сония давом этган.

Ҳисоботда айтилишича, кабинадаги овоз ёзиш мосламасида ҳалокатдан олдин учувчилардан бири иккинчисидан нега ёқилғини ўчириб қўйганини сўрагани, иккинчи учувчининг эса бундай қилмаганини айтгани сақланган.

Ҳисоботда, ҳозирча, ёнилғи узатиш калити қандай қилиб ўчиб қолгани ҳолатига изоҳ берилмаган.

Қайд этилишича, «CUTOFF» ҳолати одатда учувчилар томонидан қўнганда двигателни ўчириш ёки парвоз пайтида двигателдаги носозлик туфайли ишлатилиши мумкин.

Авиация мутахассисларининг таъкидлашича, режимни тасодифан ўзгартиришнинг иложи йўқ, чунки бу калит суриш тутқичлари орқасида жойлашган. Бундан ташқари, тасодифий ўчиришни олдини олиш учун махсус бўшатиш механизми мавжуд.

Эслатиб ўтамиз, 12 июн куни Air India авиакомпаниясининг Лондонга учаётган Boeing 787 Dreamliner самолёти шимоли-ғарбий Аҳмадобод шаҳрида ҳалокатга учради. Аэропорт периметрини кесиб ўтганидан кўп ўтмай, самолёт баландликни йўқота бошлаган ва тиббий ўқув муассасасининг ётоқхонаси устига қулаб тушган эди.

Авиакомпания ҳалокатни тергов қилишда расмийлар билан фаол ҳамкорлик қилаётганини маълум қилди.