Сурия: Идлибда қуролли тўқнашувлар қайта жонланмоқда
2011 йилда ҳукумат ҳарбий кучлари ҳамда мухолифатчи гуруҳлар низолари асосида юзага келган Идлибдаги фуқаролар уруши кейинчалик террор гуруҳлари таъсири остида янада кучайиб борди.
8 йилдан буён давом этаётган ушбу ҳарбий низолар минтақа аҳолисининг турмушини оғирлашиши, юзлаб кишиларнинг қурбон бўлиши, кўплаб аҳолининг ўз юртини ташлаб кетишига сабаб бўлмоқда.
Бу ҳақда 19 февраль куни БМТнинг Инсон ҳуқуқлари бўйича Олий комиссари Мишель Бачелет маълум қилган.
Қайд этилишича, 18 февраль куни Идлибда амалга оширилган икки қўпорувчилик ҳаракати оқибатида 16 киши ҳалок бўлган, 70 дан ортиқ аҳоли жабрланган.
─ Идлиб ҳамда Шимолий Ҳалаб шаҳарлари аҳолиси даҳшатли аҳволда яшамоқда, ─ дейди Бачелет хоним. ─ Ҳозирда минтақа аҳолиси икки олов орасида кун кўрмоқда. Бир томондан ҳукумат ва мухолифат гуруҳи ўртасидаги ҳарбий ҳаракатлар, иккинчи томондан эса Ҳаёт Таҳрир аш-Шом террор гуруҳи томонидан тинч аҳолига қаратилган қуролли ҳужумлар.
2018 йилнинг сентябрь ойида Россия ва Туркия ҳукуматлари Идлибда демилитаризация ҳудудини ташкил этиш юзасидан келишувга эришди. Ҳукуматга қарши мухолифат гуруҳлар ҳудудни тарк этган эди.
Бироқ амалга оширилган тадбирларга қарамасдан, мазкур йилнинг декабрь ойидан Суриянинг Идлиб, Ҳама ва Ҳалаб вилоятларида ҳукуматга қарши гуруҳлар билан бирга террор гуруҳларининг ҳарбий ҳаракатлари янада кучайди.
Ушбу ҳолатларни қайд этар экан, Мишель Бачелет мурожаатида мамлакатда инсон ҳуқуқларини ҳимоя қилиш, барқарор тинчликни таъминлаш ҳамда террор гуруҳлари устидан ғалаба қозонишда ҳукуматнинг қарама-қарши томонларини ўзаро бирдамликка чақирди.
Manba: uza.uz
Матнда хатолик топсангиз, ўша хатони белгилаб, бизга жўнатинг (Ctrl + Enter).
