Салвадор президенти Соросни маҳаллий ОАВни молиялашда айблади

Салвадор президенти Найиб Букеле америкалик венчур капиталист ва филантроп Жорж Соросни оммавий ахборот воситаларини глобал кун тартибини бузиб кўрсатиш учун молиялаштирганликда, шунингдек, ўз мамлакатидаги ҳукумат сиёсати ва қонунларини дикталаётганликда айблади.

“Репорт”нинг хабар беришича, Н. Букеле узоқ вақтдан бери Соросни Салвадорга “Очиқ жамият” жамғармаси орқали таъсир ўтказгани учун танқид қилиб келади.

“Нега Сорос ўз кун тартибини илгари суриш ҳуқуқига эга деб ҳисоблайди?”, деди у Мерилендда (АҚШ) йиллик консерватив сиёсий ҳаракатлар конференциясида.

Президент, шунингдек, Салвадорнинг бир қанча чап қанот нашрларини унга қарши туҳмат кампанияси олиб боришда айблаб, улар ҳам Сорос томонидан молиялаштирилганини даъво қилди: “Барча Лотин Америкаси давлатларида Соросдан маош оладиган ОАВ ва “журналистлар” бор”. Улар аслида журналист эмас, улар ўзига хос ва бузиб кўрсатилган глобал кун тартибига эга сиёсий фаоллар”.