Рим папаси хавотирда «Кучуклар ва мушуклар фарзанднинг ўрнини эгаллаяпти»
Рим папаси Франциск фарзандли бўлиш ўрнига уйда ҳайвон боқадиганларни танқид қилди. Би-би-сининг хабар беришича, папа ота-она бўлишни истамаслик инсонийликдан узоқлаштиришини таъкидлаган.
«Тамаддунлар шу тариқа кексаймоқда ва инсонийликдан маҳрум қолмоқда, чунки оталик ва оналик билан келадиган бойлик йўқ бўлмоқда», – деди у чоршанба куни Ватинканда.
Францискнинг айтишича, инсонлар фарзандли бўлишни истамаяпти ёки фақатгина битта фарзанд кўряпти, бу эса худбинликнинг бир туридир.
«Жуда кўплаб жуфтлар фарзанд кўришни истамайди ёки фақатгина битта фарзандли бўлади, лекин иккиталаб кучук, иккиталаб мушук олишади. Кучуклар ва мушуклар болаларнинг ўрнини эгаллаяпти», – деди католиклар етакчиси.
Шунингдек, папа биологик сабабларга кўра фарзандли бўла олмаётган жуфтларга бола асраб олишни маслаҳат берди.
Аввалроқ Франциск жуфтларнинг фарзандли бўлишни истамаслигини фожиа деб атаган ва туғилишнинг камайиши “демографик қиш”га сабаб бўлишини таъкидлаган эди.
