Марказий банк 11 та банк, битта микромолия ташкилоти ва битта ломбардга жарима санкциясини қўллади

Марказий банкнинг Банк назорати қўмитаси томонидан июнь ойидаги йиғилишларида (етти марта) 42 та масала кўрилди ва улар бўйича тегишли қарорлар қабул қилинди. Бу ҳақда регулятор матбуот хизмати хабар берди.

Қайд этилишича, рўйхатга олиш ва рухсат бериш йўналишида 28 та масала кўрилган. Шунингдек, кредит ташкилотларининг молиявий ҳолатига оид 14 та масала – Марказий банкнинг кўрсатмалари ва пруденсиал меъёрлари талабларининг бажарилиши, банклар ва микромолия ташкилотларида ўтказилган текширишлар натижалари ҳам муҳокама қилинган.

Марказий банк томонидан ўрнатилган иқтисодий меъёрлар талабларига риоя қилинмагани ҳамда Марказий банкка тақдим этилган маълумотларда ноаниқликларга йўл қўйилгани ва текшириш натижаларида аниқланган қоидабузарликлар учун 11 та банк, 1 та микромолия ташкилоти ва 1 та ломбардга нисбатан жарима санкцияси қўлланилган.

Бундан ташқари, қўмита томонидан банк тизими барқарорлигини сақлаш, омонатчилар ва инвесторлар ҳуқуқларини ҳимоя қилиш тамойилидан келиб чиқиб, тижорат банклари бошқарувлари ва микромолия ташкилотлари раҳбариятларига аниқланган камчиликларни тузатиш, улар бўйича тегишли чора-тадбирлар ишлаб чиқиш, ўрнатилган пруденсиал нормативларга амал қилиш, банк фаолиятида мавжуд заифликларни бартараф этиш ва молиявий ҳолатини соғломлаштиришга қаратилган талабларга риоя қилиш юзасидан тегишли кўрсатмалар берилган.

Эслатиб ўтамиз, январь бошларида Марказий банк қўмитаси Ўзбекистондаги 2 та банкка нисбатан жарима санкциясини қўллаган эди. Ўшанда Марказий банкнинг меъёрий-ҳуқуқий ҳужжатлари талабларига риоя қилиниши таъминланмагани учун 1 та ломбардга чора ва санкциялар қўлланилиши тўғрисида огоҳлантирилганди.