Кутилган концертда кутилмаган воқеалар: Алишер Файздан яна бир оригинал туҳфа (ФОТОГАЛЕРЕЯ)

Одатда, концертларга тушавермайман. "Халқлар дўстлиги" саройида меҳмон бўлмаганимга эса анча бўлганди. Кеча концертга таклифнома келди. Қарадим. Алишер Файзнинг концерти. Хонанда самимий табассум қилиб турибди. Концерт номи "Юрак сўзи". Кайфиятим кўтарилди. Тушмай бўларканми? Ишдан чиқдим-у, шошилганча санъат саройига йўл олдим.

Самимият билан бошланди

Концерт "Кўйлак" қўшиғи билан бошланди. Менга жуда ёқди шу қўшиқ. Маромига етказиб куйланган. Қўшиқдан кейин эса Алишер Файз мухлислар билан саломлашди. Шунчаки эмас, ўзгача саломлашди. Соғинч, ҳурмат, меҳр, фидойилик — ҳаммаси бор. Мухлислар айни шу лаҳзадан бошлабоқ концертга бежизга келмаганларига амин бўлишди. Мен эса бир Алишер Файзнинг мамнун юзига қарайман, бир унга меҳр билан тикилиб турган мухлисларга. Бахт бўлса шунчалик бўлар-да.

"Хизмат доирасидан ташқарида"

Бу — қўшиқнинг номи. Алишер Файз куйлаган қўшиқлар ичида менга энг ёққанларидан бири. Тўғриси, ҳар кимнинг кўнглида қайтмас лаҳзалар, болалик билан боғлиқ армонлар бор. Ухлаб ётган армонлар бор. Хонанда кеча ана шу хотираларни эслатиб юборди. Қўшиқ тугагунга қадар мен ҳам бирров болалигимга бориб келдим. Залда қўшиққа ҳамоҳанг рақс тушаётган болажонлар эса янада тиниқроқ хотирлашга туртки бўлди. Ҳаммаси пухта ўйланган. Мавзу эса шунчаки "бомба".

"Машшоқлар"

Алишер Файзнинг менга энг ёққан қўшиғи. "Най талашманг машшоқлар, Май талашманг машшоқлар" деган сатрлариёқ эътиборимни тортди. Охиригача диққат билан тингладим. Жудаям ёқди. Бугуннинг долзарб мавзуси. Ижтимоий тармоқларда, хусусан, инстаграмда бир-бири билан тортишаётган, баҳслашаётган, ўз обрўсини тушираётган шоу бизнес вакилларига тутилган кўзгу.

"Бир чемодан пул"

Алишер Файз тўхталган яна бир ноодатий мавзу. Пул учун ҳамма нарсага тайёр, ҳамма нарсани пул билан ўлчайдиган, "Пул бўлса, чангалда шўрва", жумласини шиор қилиб олган "пулсеварлар" тилидан айтилди бу қўшиқ. Мухлислар эса бундай одам аслида қандай кўринишини билиб олишди. Концертдан кейин "Ҳадеб пул деявериш яхши эмас эканей, кел, пулимдан озроғини қийналган қўшнимга берай", деб хулоса чиқарганлар бўлса, санъаткор ниятига етибди демак. Етсин. Мен эса камида бир йил қайси қўшиқни эшитиш борасидаги саволимга жавоб топдим — "Пул".

"Россияда"

Мени ростакамига йиғлатган қўшиқ. Ич-ичимдан йиғладим. Чунки қанчадан-қанча танишларим, яқинларим Россияда. Фарзандини боқиш учун жонини жабборга бериб ишлаяпти. Алишер Файз "Россиядан туриб дуо қилаётган ота" тимсолида хорижда тер тўкаётган юртдошларимизга атаб қўшиқ куйлади. Тўғри, мигрантларга аталган қўшиқлар кўп, дерсиз. Аммо буниси бошқача. Ишонмасангиз, тинглаб кўринг.

"Телефонингни ташлаб кел, болам"

Алишер Файз нафақат қўшиқ, балки, монологлари билан ҳам одамларни йиғлатди. Онасини кўргани келган, аммо онасининг олдида телефонидан бош кўтармай турган ўғиллар тимсоли. Алишер Файз ана шу ўғилларга она тилидан мурожаат қилди. Ҳақиқатда таъсирли монолог. Ростдан ҳам онасининг олдида онасига эмас, телефонига меҳр бераётган ўғил ва унга тикилиб турган она. Таъсирли, аламли, ачинарли. Монолог эса қуйидаги жумла билан тугади: "Дуоларим Аллоҳнинг олдида сенга лайк бўлсин, болам". Эҳ, она, она, доим фарзандингни ўйлайсан, меҳрлими, меҳрсизми, барибир, онасан! Аллоҳ ҳамма оналарни асрасин.

Алишер Файзнинг ҳар битта қўшиғи мухлисларга манзур келгани шубҳасиз. Аслида, бу санъаткор шунақа — вақт ўтса бўлди, демайди. Ҳар битта гапини ўйлайди, сўзини ўйлайди. Шунданми, чинакамига маза қиласиз.

Кашф қилинган Эъзоза

Алишер Файз концертида яна бир яхши анъанани бошлаб берди. У энди мухлислар орасида рақс тушишга ёки қўшиқ айтишга қизиқадиган, иқтидори борларни кашф қилади. Бунинг исботи ўлароқ хонанданинг ўтган концертларидан бирида мухлис сифатида мухлислар орасида ўйнаган қизалоқ Эъзоза Сайдалиева кеча "Халқлар дўстлиги" саройида раққоса сифатида рақсга тушди. Ажойиб рақс, ҳақиқий талант. Аслида, бизда бундай иқтидорлар кўп, фақат ана шу иқтидорларни кўра оладиган Алишер Файзга ўхшаган чин инсонлар керак.

Концерт 19 декабргача давом этаркан. Албатта, тушинг! Афсусланмайсиз. Агар Алишер Файзнинг қўшиқларини шу пайтгача тингламаган, эшитмаган ва ҳатто қизиқмаган бўлсангиз, концертга тушганингиздан кейин унинг мухлисига айланишингиз аниқ. Мен эса таассуротларимни шундай тугатмоқчиман: Аллоҳ Алишер Файзга ростдан ҳам ўзгача ФАЙЗ берган. Ўзи ана шу файздан айирмасин.

Низомжон Исломов