Кулеба: Украинага зудлик билан Patriot тизимлари керак

Украинага фуқаролик инфратузилмасини ҳимоя қилиш учун зудлик билан Patriot ракетага қарши тизимлари керак, деди ташқи ишлар вазири Дмитрий Кулеба.

Reuters агентлигининг хабар беришича, НАТОнинг Бухарестдаги икки кунлик саммити якунлари бўйича ўтказилган матбуот анжуманида вазир Киев бу масалани ҳал қилишда Германия билан ҳамкорлик қилишини ҳам айтган.

Польша шарқида ракета ҳалокатга учрагач, Германия ҳукумати ҳаво ҳудудини ҳимоя қилиш учун унга замонавий Америка Patriot тизимларини топширишни таклиф қилди. Бунга жавобан Польша ҳукумати ушбу мажмуаларни Украина ғарбида, улар кўпроқ зарур бўлган жойда жойлаштиришни таклиф қилди. Бироқ, Германия буни АҚШ билан келишувсиз мумкин эмаслигини тушунтириб, рад этди.

АҚШ мудофаа вазирлиги вакили бир кун аввал Вашингтон Украинага Patriotларни етказиб беришни режалаштирмаётганини, аммо бу борадаги мунозаралар давом этаётганини айтди.

У, шунингдек, ушбу комплексларни Украинага бошқа давлатлар томонидан бериш масаласи уларнинг суверен ҳуқуқи эканлигини, аммо АҚШ бу қарор НАТО бўйича барча иттифоқчилар билан муҳокама қилингандан сўнг қабул қилинишини кутаётганини айтди.