Германия иқтисодиёти пандемиядан кейин гуллаб-яшнайди, ўзининг кучли томонларини намойиш эта олган мамлакат Хитой ва АҚШдан фарқли ўлароқ, коронавирусдан фойда олиш имкониятига эга бўлади.

Бу ҳақда “The New York Times” газетаси ёзмоқда.

Қайд этилишича, АҚШ ва Хитой жуда катта қарзларга ботишган, Германия эса оз.

Мутахассисларнинг таъкидлашларича, яхши ишбилармонлик обрўси немис экспортини жаҳон савдосининг пасайиши фонида ҳимоя қила олади. Ваҳоланки, Германия ишчиларининг аксарияти тўлиқ бўлмаган иш вақтидаги тизим туфайли иш жойлари ҳамда ҳақларини сақлаб қолишган - компаниялар тўлиқ бўлмаган иш жойларини сақлаб қолганлиги учун давлатдан тўловлар олишган.

“Германия инқирозга бюджетнинг профицити билан кирди, расмийлар оилаларга тўғридан-тўғри тўловларни амалга оширди, солиқларни камайтирди, корхоналарга кредитлар берди, ёрдамларнинг умумий ҳажми ЯИМнинг 55 фоизини ташкил этди. Шунингдек, мамлакат қўшни Европа давлатларига молиявий ёрдам кўрсатишга рози бўлди. Бошқа кўплаб мамлакатлардан фарқли ўлароқ, Германия барча танг вазиятларни енгишга қодир”, деб ёзади газета.

Пандемия оқибатида мамлакат ялпи ички маҳсулотининг 2020 йилда 6,3 фоизга қисқариши кутилмоқда. Биринчи чоракда иқтисодиёт 2019 йилнинг сўнгги уч ойига нисбатан 2,2 фоизга тушди. Мутахассисларнинг таъкидлашича, Германия товарларига талабнинг тикланиш суръати ҳал қилувчи бўлади.