«Кореяда инновацион усулда қайта тикланган автомобиль эҳтиёт қисмлари» кўргазмаси ва семинари бўлиб ўтди
Ўзбекистон Республикаси Инновацион ривожланиш вазирлиги, Чирчиқ шаҳар ҳокимлиги ва Корея Республикасининг “Green Kapra Co., Ltd” компанияси билан ҳамкорликда «Ўзбекистонда автомобиль бутловчи қисмларни қайта тиклаш бўйича платформани яратиш» инновацион лойиҳаси амалга оширилмоқда. Ушбу лойиҳа доирасида Ўзбекистон Республикаси Инновацион ривожланиш вазирлигида «Кореяда инновацион усулда қайта тикланган автомобиль эҳтиёт қисмлари» кўргазмаси ва семинар ўтказилди.
Тадбирда Корея Республикасининг Савдо саноат ва энергетика вазирлиги бошчилигида автомобиль эҳтиёт қисмларини ишлаб чиқарувчи ва қайта ишловчи 9 та компания вакиллари ўз инновацион маҳсулотлари билан иштирок этди.
Семинар давомида қайд этилишича, Корея Республикасида 2005 йилдан бери қайта таъмирланган маҳсулотлар ҳақида қонун мавжуд. Маҳсулотларни қайта таъмирлаш унинг қўшимча қийматини яратиш, экологияга зарар етказмасликка кўмак беради. Шунингдек, табиий ресурслар, жумладан энергия иқтисод қилинади.
Кореядан ташриф буюрган мутахассислар фикрича, улар глобал экологик ривожланишда Еврода мамлакатларидан ҳануз ортда қолмоқда. Мамлакат экспортга йўналтирилган ва Европанинг экологик ишлаб чиқариш қоидаларига амал қилади.
Ҳозирги кунда Кореяда унитилизация қилишга осон бўлган маҳсулотларни ишлаб чиқариш қонун-қоидалари йўлга қўйилган. Мисол учун, барчага маълум уяли телефонда ишлатиладиган қимматбаҳо металларни қайта ишлатиш. Ушбу амалиёт натижасида иқтисодиёт қанча фойда кўришини ҳисоблаб чиқилмоқда. Буни амалиётга жорий этиш қазилма бойликлари йўқ давлатлар учун жуда муҳим. Сабаби улар қазилмаларни ўз давлатларига жуда ҳам қиммат нархларда импорт қилади. Шу сабаб мазкур йўналиш Корея ҳукумати томонидан қўллаб-қувватланмоқда.
Шунингдек ҳозирда саноат мажмуаларидан чиқаётган чиқиндидан бошқа саноат мажмуаларида фойдаланиш устида ҳам кенг кўламли ишлар олиб борилмоқда.
Анжуман давомида соҳа мутахассислари, тегишли вазирлик ва идоралар вакиллари иштирокида лойиҳани амалга ошириш юзасидан манфаатли узоқ муддатли ҳамкорликни йўлга қўйиш ва сифатли маҳсулотларни етказиб бериш масалалари муҳокама қилинди.
Семинарда Инвестициялар ва ташқи савдо вазирлиги, Қурилиш вазирлиги, Ўзбекистон Савдо-саноат палатаси, «Ўзавтосаноат» АЖ ва тизим корхоналари, “UzTest” Ўзбекистон илмий-синов ва сифат назорат маркази, Тошкент давлат транспорт университети, Турин политехника университети ва Тошкент давлат техника университетидан вакиллар қатнашдилар.
