«Катта еттилик» давлатлари Эронга «муҳим янги чоралар» билан жавоб беради
G7 ташқи ишлар вазирлари Эрондан Россияга баллистик ракеталар ва жанговар дронларни етказиб беришни тўхтатишни талаб қилди.
«Катта еттилик» ташқи ишлар вазирлари Эронни Россияга баллистик ракеталар етказиб бергани учун қоралаган қўшма баёнот берди.
Сўнгги кунларда Ғарб давлатлари Эрон Россияга илк Fath-360 ракеталарини етказиб берганини бир неча бор таъкидлаган эди. Теҳрон буни рад этади, Москва эса изоҳ беришдан бош тортади.
«Эрон зудлик билан Россиянинг Украинага қарши ноқонуний ва ҳимоя қилиб бўлмайдиган урушини қўллаб-қувватлашни тўхтатиши ва Украина халқи ҳамда кенгроқ Европа ва халқаро хавфсизликка тўғридан-тўғри таҳдид соладиган баллистик ракеталар, учувчисиз учоқлар ва тегишли технологияларни етказиб беришни тўхтатиши керак», — дейилади баёнотда.
Шунингдек, «Катта еттилик» давлатлари Эронни Россиянинг Украинадаги урушини қўллаб-қувватлаганликлари учун жавобгарликка тортишдан воз кечмасликлари ва аллақачон «муҳим янги чоралар» билан жавоб беришганлиги қайд этилган. 10 сентябрь куни Буюк Британия, Франция, Германия ва АҚШ Эронга қарши янги санкциялар жорий этди, хусусан, у билан тўғридан-тўғри рейсларни тўхтатди.
