Журналистларнинг дўсти эди...

Журналистларнинг дўсти эди...

Миёнкол ҳудудидаги Оқдарё туманининг табиати сўлим. Икки дарё — Оқдарё ва Қорадарёдан уфуриб турадиган салқин ҳаво бу жойларда одамларнинг яшаш имкониятини тағин ҳам яхшилаган. Кўпгина қишлоқлардаги табиий гўзаллик, файзу таравот маҳаллий аҳоли қалбига ҳам кўчиб ўтган, дейилса муболаға бўлмас.

Туманнинг кунботар тарафида Янгиқўрғон аталмиш ажиб қишлоқ бор. Бу ердан кўплаб элга хизмати сингган, турли соҳалар эгалари бўлган ажойиб инсонлар етишиб чиққан. Уларнинг ташаббуси, ғайрат-шижоати, ақлу заковоти туфайли Янгиқўрғон йил сайин чирой очиб, аҳоли маданияти, маънавияти ошиб бораверган, боғлар, гулзорлар яратилган.

Мазкур қишлоқ фарзанди, узоқ йиллар элига сидқидидан хизмат қилган зиёли, тадбирли тадбиркор, Ўзбекистон Олий Мажлиси депутати бўлган Жамол Исроилов юртдошларига меҳрли, ташкилотчи, самимий инсонлардан бири эди.

Жамол Исроилов билан танишган пайтларимиз у Оқдарёдаги 2-мактаб директори эди. Шу билан биргаликда тадбиркорликка ҳам қўл ўрганди. Айнан ўша чоғлар, Жамол ака Ўзбекистон Олий Мажлиси депутатлигига сайланди. Бир гал Тошкентдан биргаликда қайтдик. Яна бир шеригимиз Нарпай туман газетаси муҳаррири Тошпўлат Тошмуродов эди. Аҳамиятлиси, Тошпўлат ака ҳам Олий Мажлис депутатлигига ўтказилган сайловда ғолиб чиқиб, депутатлик мандатига эга бўлганди. Шу кундан Жамол Исроиловни янада яқиндан таниган, у ҳақдаги тасаввурларим анча кенгайганди. Жамол ака фаолияти ҳақида унинг ўзи эмас Тошпўлат ака кўпроқ гапирганди. Кейинчалик билдимки, Жамол Исроилов ижодкорларга анча яқин инсон экан. Олий Мажлис йиғилишларидан чиқиб, у таҳририятларга борар, журналистлар билан дилдан суҳбатлашарди. Ана шундай суҳбатлардан бири “Халқ сўзи” газетаси ижодкорлари билан бўлганди.

“Оқдарё овози” газетасининг бош муҳаррири, “Йилнинг энг фаол журналисти” республика танловининг ғолиби Йўлчи Муҳаммадиев Жамол Исроилов ҳақида шундай хотирлайди:

“Жамол Исроилов билан бундан қирқ йилларча муқаддам ўтган асрнинг саксонинчи йиллари бошларида илк бор учрашган эдик. У пайтда у кишининг укаси дўстимиз Баҳодир Исроилов туман матлубот жамиятлари уюшмасида бош ҳисобчи бўлиб ишлар, у киши билан тез-тез кўришиб турардик. Лойиш марказидаги ҳозирги эски истироҳат боғи деб аталган жой бизнинг энг севимли, қадрдон масканимизга айланганди. Кунлардан бир куни Жамол ака билан суҳбатлашиб қолдик. Суҳбат жудаям самимий бўлди. Шунда англадимки, мутахассислиги бўйича мактабда физика фанидан сабоқ берадиган Жамол аканинг дунёқараши, фикрлаши ҳамкасбларига қараганда анча бошқачароқ, матбуотга бўлган меҳри ҳам ўзгача эди. Жамол ака газетамизни мунтазам кузатиб бориши ҳақида гапириб, ундаги ютуқлар билан бир қаторда айрим камчиликлар, айниқса танқидий мақолаларга эътибор камлиги тўғрисидаги фикрларини айтди. Баъзан у кишининг ўзи ҳам долзарб мазуларда чиқишлар қилди. Бугун менда Жамол ака билан боғлиқ хотиралар шу қадар кўпки, уларнинг ҳар бири азиз ва қадрли.

Айниқса, унинг 1999 йилнинг декабрь ойида бўлиб ўтган Ўзбекистон Олий Мажлиси депутатлигига сайловлар жараёнида халқ билан қилган мулоқотларини кўриб, очиғи қойил қолганман. Чунки ўша пайтда номзодликка қўйилганлар орасида вилоят миқёсидаги раҳбарлар ҳам бор эди. Қолаверса, вилоят кенгаши депутатлигига ҳам номзоди кўрсатилган бўлиб, депутатликка туман ҳокимининг ўзи ҳам номзод қилиб қўйилганди. Ўшанда кураш қизғин кечди. Биз бир гуруҳ дўстлар Жамол Исроиловнинг номзоди учун халқ билан бевосита ҳаракат қилдик. Шахсан ўзим ишончи вакили сифатида туманда мавжуд бўлган 127 та қишлоққа бориб, оқсоқоллар, ўқитувчилар, хуллас, барча касб эгалари билан юзма-юз суҳбатлашдим. Уларнинг сўзларидан шуни англадимки, оддий халқ ҳам Жамол Исроиловни етук халқ таълими ходими, тажрибали педагог, иқтидорли раҳбар сифатида яхши билишаркан. Шу билан бир қаторда бу инсоннинг тадбиркор сифатида туман аҳолисига қилаётган беғараз ёрдамидан ҳам аҳолининг хабардорлиги Жамол Исроиловнинг сайловда ғолиб чиқишига олиб келди. Шу тариқа Оқдарёнинг фидойи фарзанди Жамол Исроилов кўпчилик овоз билан Ўзбекистон Олий Мажлиси депутатлигига сайланди.

Депутат бўлгач ҳам у журналистлар билан ҳамкорликда иш юритганлигини оқдарёликлар яхши билишади. Ҳар ҳафтанинг шанба куни депутат қабули “Оқдарё овози” газетасида ўтказилар, депутатга мурожаат қилувчилар бу ерга ташриф буюришарди. Баъзи кунлари аҳолининг кўплиги сабабли қабул эрталаб соат 9 дан кечки 17 га қадар давом этарди. Бир сўз билан айтганда, бирор кимса у кишининг қабулидан норизо бўлиб кетмасди.

Бевосита у кишининг маслаҳатлари асосида мен уч қисмдан иборат бўлган “Оқдарё фарзандлари” ва икки қисмдан иборат бўлган “Оқдарё баёзи” китобларини нашрдан чиқардим. Энг қувонарлиси, бу китоблар барча билим масканлари ва ташкилотларга тарқатилди. Мухлислар ҳам очиқ чеҳра билан кутиб олишганлиги бизни беҳад мамнун этди. Шуни алоҳида таъкидлашим керакки, Жамол Исроилов журналистларнинг ҳақиқий дўсти эди. Ҳар йили нишонланадиган касб байрамларимизда табриклашни, аниқроғи, таҳририятга келиб ходимларни қутлашни канда қилмасди. Бир сўз билан айтганда, оқдарёлик журналистлар бу инсонни шу юртнинг фидойи фарзанди, тажрибали ва ташкилотчи раҳбари сифатида доимо ёдларида сақлашади.

Яқинда Жамол Исроилов раҳбарлик қилган Оқдарёдаги 2-мактаб ва ИДУМда бўлдик. Иккала муассаса катта бир ҳовлида жойлашгани эътиборлидир. Бу ерда амалга оширилган ободончилик ва кўкаламзорлаштириш ишлари Жамол Исроиловнинг саъй-ҳаракатлари натижаси, албатта. Четдан қаралганда у мактаб ҳовлисини эмас, кўпроқ санаторий типидаги дам олиш масканларини эслатади.

ИДУМга Жамол аканинг фарзанди Бекжон раҳбарлик қилаётган экан. Бу ердаги таълим-тарбия, ободонлаштириш ва кўкаламзорлаштириш каби ишларга ҳавас қилса арзирди. Ҳовлидаги ҳисобини топишга саноқда ҳам адаштирувчи юзлар, эмас, минглар билан ўлчанувчи игна баргли дарахтларда нафақат журналистларга, барча касб эгаларига яқин дўст бўлган Жамол Исроиловнинг нафаси сезилиб тургандек эди.

Абдурасул САТТОРОВ,

Алимардон ХУДОЙҚУЛОВ


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!