Исроил ҳаво ҳужумида ливанлик оила ҳалок бўлди
Исроил ҳарбий самолётлари вақтинчалик ўт очишни тўхтатиш тўғрисидаги халқаро чақириқларни рад этиб, Ливанга зарба беришда давом этмоқда.
Ливан Миллий Ахборот Агентлиги Исроилнинг Ливан шарқидаги Баалбек шаҳри ва унинг атрофидаги ҳудудларга энг кучли ҳаво ҳужумлари ҳақида хабар берди.
Ҳужумлар натижасида Шаат шаҳридаги бутун бир оила ҳалок бўлди. Ливан соғлиқни сақлаш вазирлиги Аита аш-Шаб қишлоғида уч киши ва мамлакат жанубидаги Қана шаҳрида бир Сурия фуқароси ҳалок бўлганини тасдиқлади.
Гувоҳлар Анадолу агентлигига жанубдаги Тире ва Набатие минтақасига бир кеча-кундузда уюштирилган ҳаво ҳужумлари ҳақида маълум қилди.
Ушбу ҳужумлар чоршанба куни кечқурун эълон қилинган 21 кунлик оташкесим ҳақидаги АҚШ, Европа Иттифоқи ва бошқа тўққиз давлатнинг чақириғига қарамай содир бўлди. Халқаро ҳамжамият можаронинг минтақавий тарқалиш хавфидан огоҳлантирди.
Ливан Соғлиқни сақлаш вазирлиги маълумотларига кўра, кескинлашув бошланганидан бери камида 610 киши ҳалок бўлган, 2000 дан ортиқ киши жароҳатланган.
