"Ҳалокат, даҳшат, зулмат": украиналик жангчилар Суджадаги сўнгги кунлар ҳақида сўзлаб берди

Украиналик аскарлар ББCга Россиянинг Курск вилоятидан фожиали чекинишлари ҳақида сўзлаб, бўлаётган воқеаларни даҳшатли фильмга ўхшатишди. Улар кучли ўт остида, йўқ қилинган техника колонналари ва Россия дронларининг узлуксиз ҳужумлари шароитидаги ҳалокатли вазиятни тасвирлаб беришди.

9 март куни жангчилардан бири Владимир (барча аскарларнинг исмлари хавфсизлик нуқтаи назаридан ўзгартирилган) Суджа шаҳрида эди. У ерда ваҳима ва фронт чизиғининг қулаши бошланган эди. "Украина қўшинлари чекинишга уриндилар - йўлдаги техника колонналари Россия дронлари туфайли ёнмоқда. Кундузи ҳаракатланиш мутлақо имконсиз," деди у.

Владимирнинг таъкидлашича, бир ой олдин Суджадан Суми вилоятигача бўлган йўл нисбатан хавфсиз бўлган, бироқ 9 мартга келиб, у доимий душман ўқлари, айниқса дронлар ҳужуми остида қолган. "Бир дақиқада икки-учта дронни кўриш мумкин. Бу жуда кўп," дея қўшимча қилди у.

Бошқа бир жангчи Антон 11 мартдаги чекинишни "ҳалокат" деб атади. У Россия ҳозирда ҳаводан аниқ зарбалар бериш ва дронлардан фойдаланишда устунликка эга эканлигини таъкидлади. "Логистика энди ишламаяпти. Қурол-яроғ, ўқ-дори ва озиқ-овқат етказиб бериш имконсиз бўлиб қолди," - деди у ва таъминот йўллари тўсиб қўйилганини қўшимча қилди.

Антон кечаси Суджадан пиёда қочишга муваффақ бўлди ва бир неча бор ҳалок бўлишига сал қолганини айтиб ўтди. "Дронлар тинмай осмонда айланмоқда." У, шунингдек, ўз башоратига кўра, Курск вилоятидаги бутун Украина плацдармининг йўқотилишини таъкидлади, гарчи ҳарбий нуқтаи назардан "Курск йўналиши ўз аҳамиятини йўқотган" бўлса-да.

Яна бир аскар Дмитрий чекинишни "даҳшатли фильм саҳнаси"га ўхшатди. "Йўллар юзлаб вайрон қилинган техникалар ва ярадорлар билан тўлиб кетган," - деди у ва техника колонналари ортидан Россия дронлари ов қилаётганини қўшимча қилди.

Аммо барча жангчилар вазиятни бундай қора бўёқларда тасвирламаяпти. Улардан бири операция маълум ютуқларга эришганини таъкидлади - буфер зона яратилгани туфайли россияликлар Сумига кира олмаяпти.

Бош штаб маълумотларига кўра, Курск йўналишида бир кеча-кундузда 14 та жанговар тўқнашув юз берган, Россия қўшинлари 11 та авиазарба берган, 18 та бошқариладиган бомба ва 289 та артиллерия ўқидан фойдаланган, жумладан 12 марта реактив ялпи ўт очиш тизимларидан ҳужум қилган. Эълон қилинган жанг ҳаракатлари харитасида ҳудуднинг бир қисми ҳамон Украина қўшинлари назоратида қолаётгани кўринади.

"Айдар" баталиони ротасининг собиқ қўмондони Евгений Дикий Курск вилоятида Украина ва Россиянинг йўқотишлари нисбати Украина фойдасига 1 га 10 ни ташкил этаётганини таъкидлади.