Ғазода ҳалок бўлган фаластинликлар сони 29 минг 692 нафарга етди
![Ғазода ҳалок бўлган фаластинликлар сони 29 минг 692 нафарга етди Ғазода ҳалок бўлган фаластинликлар сони 29 минг 692 нафарга етди](/photos/news/DEQA4hmW8Wr1TiO.jpeg)
Сўнгги 24 соат ичида Исроил ҳарбийларининг ҳаракатлари натижасида 86 нафар фаластинлик ҳалок бўлди, 131 нафари яраланди. 2023 йил 7 октябрда бошланган ХАМАС ва Исроил ўртасидаги можаро авж олгандан бери Ғазо секторида ҳалок бўлган фаластинликларнинг умумий сони 29 692 нафарга, анклавдаги жами ярадорлар сони эса 69 879 нафарга етди. Бу ҳақда якшанба куни ХАМАС назоратидаги Соғлиқни сақлаш вазирлиги хабар берди.
Вазирликнинг матбуот баёнотида қайд этилишича, Исроилнинг шиддатли ўққа тутилиши ҳамда фуқаролик мудофааси бўлинмалари ва тез ёрдам бригадаларининг етишмаслиги туфайли баъзи қурбонлар ҳануз вайроналар остида қолган бўлиши мумкин. Бу ҳақда Синьхуа агентлиги ёзди.
Ўз навбатида, Исроил мудофаа кучлари (IDF) якшанба куни Ғазо сектори жанубидаги жангларда икки аскар ҳалок бўлганини маълум қилди.
Исроил армиясининг маълум қилишича, Ғазо жанубидаги жангларда бир зобит ва яна икки аскар оғир яраланган ва шифохонага етказилган.
Эслатиб ўтамиз, 2023 йил 7 октябрь куни ХАМАС жангарилари 1200 га яқин одамни ўлдирган, 240 дан ортиқ кишини гаровга олган эди. Уларнинг Исроил жанубига кутилмаган ҳужумига жавобан Исроил армияси Ғазо секторида ХАМАСга қарши кенг кўламли ҳужумларни амалга оширмоқда.