Фан ойлиги: «Физика ва ҳаёт»
Бугунги тараққиёт замонида ҳар бир соҳа бирмунча ютуқ ва марраларни кўзлаб ўз олдига мақсад қўйиб, улкан ишларни олиб бормоқда. Албатта, бу мақсадли соҳалар қаторида таълим йўналишидаги кенг кўламли ислоҳотларни алоҳида эътибор билан тилга олиш жоиз. Жумладан, ҳар бир фанни мукаммал ўқитишни олиб бориш ҳамда уларнинг соҳадаги ютуқларини сезиларли даражада ошириш мақсадида Халқ таълими вазирлиги томонидан йил ойларини фанлар кесимида тақсимлаб, фан ойликларини ташкил қилиш амалга жорий этилган. Худди шундай ойликлар қаторида март ойи ҳам физика фани ойлиги деб эътироф этилган.
Шу ойлик доирасида Мирзо Улуғбек туманидаги 248-умумтаълим мактабида ҳам Физика ва ҳаёт номли тадбир ташкил этилди. Тадбир доирасида эса ўқувчилар ўртасида тезкор савол-жавоб, масалалар ечиш, физик олимлар ҳақида нимани биласиз? топ викторинаси ҳамда амалий шартлар каби бир қанча шартлар ташкил қилинди. Мактабнинг 8-синф ўқувчиларини тўлиқ қамраб олган бу тадбир кўтаринки руҳда ўтди.
Юқорида санаб ўтилган шартларни эса ҳар бир 8-синфдан сараланган 5 нафардан ўқувчилар рақиб жамоалар тарзида бирлашиб, ўзаро мусобақалашишди. Айниқса, амалий шартларни қамраб олган физик жиҳозларни топиш, улар билан амалий иш (вазифа) бажариш каби кичик-кичик қизиқарли бўлимлар ўқувчилар билимини бойитиш билан бир қаторда, бу фанга бўлган қизиқишларини яна бир карра оширди. Формулалар дунёси, физик жараёнларнинг ажойиботлари ҳар бир қатнашчи ва ўқувчиларни ўз оламига олиб кирди.
Ўқувчилар онгида жамоа бўлиб ишлаш, ҳар қандай вазиятда ёнидаги шеригини ҳис қилиш каби инсоний фазилатларнинг шаклланувида ҳам тадбир маълум даражадаги туртки вазифасини ўтади. Энг муҳими, битта тадбир кўринишида ўқувчиларнинг чорак мобайнида олган физик билимлари янада мустаҳкамланди. Тадбир якунида эса энг фаол ўқувчилар муносиб рағбатлантирилди. Ҳамма жамоадан билим ва салоҳияти устун келган, мактабнинг 8- Д синфи жамоаси эса тадбир ғолиби деб топилди.
Ҳар бир ойда бу каби фан ойликларинг тадбирлар, очиқ дарслар кўринишида ташил этилиши ўқувчиларнинг фанларга ва билим олишга бўлган қизиқиш-иштиёқларини ўстиради. Эгаллаган билимларини эса пухта такрорлашларига замин яратади. Фанларни ўз вақтида мукаммал ўзлаштирган ёшлар эртанги кунда юртга, элга нафи юқори бўлган мутаххасис кадрлар бўлиб етишадилар.
Мирзо Улуғбек туманидаги 248-мактаб физика фани ўқитувчиси
Болтаева Гулизар
