Дунё тарихидаги учинчи рақамли йирик олмос топилди

Ботсванада 219,6 грамм келувчи йирик олмос топилди. Бу бутун тарих давомида топилган учинчи рақамли энг йирик олмос ҳисобланади. Ботсвана ҳукуматида таъкидланишича, олмос июн бошида аниқланган, бироқ у эндигина оммага тақдим қилинди.

Қимматбаҳо тошнинг ўлчами 1098,3 каратни (219,6 грамм) ташкил қилади. У мамлакат шимолидаги Жваненг конида ҳукуматга тегишли Debswana компанияси ва олмос қазиб олиш билан шуғулланувчи дунёдаги энг катта компания De Beers томонидан топилган.

Таъкидланишича, олмосни сотишдан олинадиган даромад мамлакатни ривожлантиришга йўналтирилади.

Аввалроқ ҳам Бостванада 1109 каратлик олмос топилган эди. Lesedi La Rona деб номланган ушбу олмос 53 млн долларга сотилган.

Бироқ энг йирик олмослар рейтингида биринчи ўринни ҳамон 3106 каратлик афсонавий «Куллинан» эгаллаб келмоқда. Қимматбаҳо тош ЖАРда 1905 йилда топилган ва кейинчалик бўлакларга парчаланган. «Куллинан»нинг баъзи қисмлари Британия қироллик оиласи тожини безаб туради.