CCВ: Юртимизда 22 та хорижий университет билан ҳамкорликда тиббиёт кадрлари тайёрланмоқда

Ўктам Исмаилов,
Соғлиқни сақлаш вазирлиги
фан ва таълим бошқармаси бошлиғи:

— Бўлажак тиббиёт ходимларини ўқитиш ўта масъулиятли вазифа. Шу боис юртимизда ушбу йўналишда илғор таълим стандартлари асосида юқори малакали мутахассислар тайёрлашга жиддий эътибор қаратиляпти. Бу ўз навбатида соҳада кадрлар сиёсатини сифат жиҳатдан янги босқичга олиб чиқаётир.

Хўш, ушбу ижобий ўзгаришлар нималарда намоён бўлмоқда?

Аввало шуни айтиш керакки, охирги 5-6 йил ичида мамлакатимизда олий тиббий таълим муассасалари сони 11 тага етказилди.

Хусусан, Тошкент тиббиёт академиясининг Термиз филиали, Фарғона жамоат саломатлиги тиббиёт институти (ФЖСТИ) ва Қорақалпоқ тиббиёт институтлари ташкил этилди.

Тошкент, Сирдарё, Жиззах Навоий, Қашқадарё ва Наманган вилоятлари олий таълим муассасаларида 6 та тиббиёт факультетлари очилди.

Бухоро давлат тиббиёт институтида Туркиянинг соғлиқ билимлари университети билан ҳамкорликда Туркия тиббиёт факультети;

Тошкент шаҳрида Н.И. Пирогов номидаги Россия тиббиёт университетининг филиали;

Жиззах шаҳрида Қозон федерал университети филиали ташкил этилди.

Қолаверса, Россия, Корея, Германия, Белорусь, Туркия, Украина, Ҳиндистон, Италия, Хитой, Польша давлатларининг 22 та университети билан 12 та бакалавриат таълим йўналишлари, 10 та магистратура ва 8 та клиник ординатура мутахассисликлари бўйича халқаро қўшма таълим дастурлари асосида кадрлар тайёрлаш тизими йўлга қўйилди.

Натижада бакалавриатда 4 та янги таълим йўналиши очилиб, қабул квоталари 2,4 бараварга ортди.

Магистратурада 14 та янги мутахассиcлик ташкил этилиб, квоталар 3 бараварга ошган бўлса, клиник ординатурада 6 та янги мутахассислик ҳисобига қабул ўринлари 2 бараварга ортди.

Шунингдек, интернатура жорий этилиб, 19 та йўналишда йилига 500 нафар тор мутахассис тайёрланмоқда.

Ўқув режаларидаги номутахассис фанлар улуши эса 2 баробарга қисқартирилди.

Ушбу ижобий ўзгаришлар, шубҳасиз соҳада юқoри дaрaжaдаги мутахассислар тайёрлашга хизмат қилмоқда.