Алишер Усмонов, Путин, долларни тақиқлаш: АҚШ Россияга қарши янги чекловлар тайёрлади

Республикачи Жим Банкс Россияга қарши чеклов чораларининг янги лойиҳасини тақдим этди, деб хабар беради АҚШ Конгресси сайти.

Ҳужжат кўриб чиқиш учун 19 январь куни тақдим этилган. Ташаббусни яна 38 конгрессмен қўллаб-қувватлади. Лойиҳа матни ҳали расман чоп этилмаган.

Washington Post нашрига кўра, у «Путиннинг жавобгарлиги тўғрисидаги қонун» деб номланади ва қуйидаги бандларни ўз ичига олади:
— Донбаcсдаги «Россия томонидан қўллаб-қувватланадиган» кучларни террорчилар деб эълон қилиш ва Россияни терроризм ҳомийси деб тан олиш;
— Россия давлат қарзи билан операцияларни тақиқлаш;
— «Шимолий оқим 2», шу жумладан, тегишли ташкилотлар ва уларнинг акциядорларига қарши чоралар;
— АҚШ агентликларига ҳужумлар тугамагунча киберхавфсизлик бўйича мулоқотни молиялаштиришни тўхтатиш;
— Қрим Россия ҳудуди бўлиб қолар экан, стратегик барқарорлик бўйича мулоқотни молиялаштиришни тўхтатиш;
— Россия президенти Владимир Путин, ҳукуматнинг барча аъзолари, шунингдек, Россия расмийлари ва хавфсизлик ходимлари, жумладан Россия етакчисининг матбуот котиби Дмитрий Песков, Москва мери Сергей Собянин, президент маъмурияти раҳбарининг биринчи ўринбосари Сергей Кириенкога нисбатан санкциялар;
— россиялик ишбилармонларга нисбатан санкциялар: Роман Абрамович, Алишер Усмонов, Олег Дерипаска, Игор Сечин ва бошқалар;
— журналистларга қарши санкциялар: Маргарита Симонян, «Россия Сегодня» ва РТ телеканаллари бош муҳаррири, теле ва радио бошловчиси Владимир Соловёв ва «Биринчи канал» бош директори Константин Эрнст.

Бир кун аввал АҚШ президенти Жо Байден ўз лавозимида бўлганлигининг бир йиллигига бағишланган матбуот анжумани чоғида Украина атрофида вазият кескинлашган тақдирда Вашингтон Москвага қарши янги чекловлар пакетини қабул қилишга тайёрлигини айтди. У Россия банкларига долларда операцияларни амалга оширишни тақиқлаши мумкинлигини таъкидлади.