Xitoy Marsga o‘zining ilk uchuvchisiz raketasini uchirdi

23 iyul payshanba kuni Xitoy Mars sayyorasiga o‘zining ilk uchuvchisiz raketasini uchirishga muvaffaq bo‘ldi. Xitoyning eng yirik tashuvchi raketasi bo‘lgan “Long March 5 Y-4” Hainan orolidagi Venchang Fazo Markazidan 12:41 da uchirildi.

2020 yilda Mars sayyorasi Yerga eng yaqin masofaga kelgan bo‘lib, hozirda bu ikki sayyora orasidagi masofa 55 million kmni tashkil qilmoqda. Sayyoralarning bir-biriga bu darajada yaqin kelishi har 26 oyda bir marta sodir bo‘ladi va bu holat 1 oy davom etadi.

Xitoyning raketasi Marsga keyingi yilning fevral oyida yetib borishi kutilmoqda. Mazkur fazo kemasi Marsning shimoliy yarimshridagi “Utopia Planitia” deb nomlangan tekisligigiga qo‘nishga urinib ko‘radi va u yerni o‘rganish uchun maxsus kichik mashinani 90 kunga tushirib qoldiradi.

Agar ushbu missiya muvaffaqiyatli amalga oshsa, Xitoy o‘zining birinchi urinishidayoq Mars orbitasiga kirgan, unga qo‘ngan va maxsus tadqiqot mashinasini joylashtirgan dunyodagi birinchi mamlakatga aylanadi.

Marsga 1960 yildan beri 50 dan ortiq missiyalar amalga oshirilgan bo‘lib, ularning yarmi texnik muammolar tufayli muvaffaqiyatsizlikka uchragan. Bu sayyoraga uchirilgan raketalarning faqat juda oz qismigina u yerga qo‘nishga urinib ko‘rgan.

“Ushbu missiya qiyinchiliklarga boy bo‘lishi va oldingi raketalarning harakatlaridan boshqacharoq bo‘lishi mumkin. Bu tadqiqot dasturi hisoblanadi, shuning uchun uning muvaffaqqiyatli bo‘lishiga 100 foiz kafolat yo‘q. Agar missiya barbod bo‘lsa yoki biror muammo tug‘ilsa, biz olg‘a intilishda davom etamiz va ushbu loyihani boshqattan amalga oshiramiz” deydi ushbu missiyaning matbuot kotibi Liu Tongji.

Liu ushbu loyihaning qiymatini oshkor qilmadi, lekin uning so‘zlariga ko‘ra, 2014 yilda boshlangan mazkur missiya “juda tejamkor” narxda bo‘ldi.