O‘zbekistonlik shaxmatchilar jamoalar o‘rtasidagi JChda 4-o‘rinni egallab, 80 ming yevro mukofotga ega chiqdi

Buyuk Britaniyaning London shahri rapid va blis yo‘nalishlari bo‘yicha o‘tkazilgan jamoaviy Jahon chempionatiga mezbonlik qildi. Musobaqada dunyoning 55 nafar jamoasi ishtirok etdi. O‘zbekiston terma jamoasi ham kuchli tarkib bilan sovrinli o‘rinlar uchun kurash olib bordi. Musobaqada o‘zbekistonlik yetakchi grossmeysterlar – Rustam Qosimjonov, Nodirbek Abdusattorov, Javohir Sindarov, Nodirbek Yakubboev, Shamsiddin Vohidov, Afruza Hamdamova, Nilufarxon Imomqo‘ziyeva, va Gulruhbegim Tohirjonova qatnashdi. Jamoaga Saydali Yo‘ldoshev sardorlik qildi.

Musobaqaning umumiy mukofot jamg‘armasi 500 ming yevroni tashkil etadi. Shundan rapid yo‘nalishiga 310 ming, blis yo‘nalishiga esa 190 ming yevro ajratilgan. Dastlabki uch kun davomida rapid bahslari bo‘lib o‘tdi. Har bir jamoa 12 ta bahsda dona surdi.

O‘zbekiston terma jamoasi hal qiluvchi uchinchi kungi bahslarda ikki g‘alaba, bir durang va bir mag‘lubiyat qayd etdi. 12-turdagi yakuniy o‘yinda Nodirbek Abdusattorov fransiyalik kuchli raqib Alireza Firuzjaga qarshi kechayotgan partiyada mag‘lubiyatga yaqin kelgandi, biroq u dahshatli kambekni amalga oshirib, g‘alabaga erishdi. Bu natija Hikaru Nakamura, Uesli So, Maksim Vashe-Lagrav, Aleksandra Kostenyuk kabi kuchli shaxmatchilar jam bo‘lgan WR Chess Team ustidan 3,5:2,5 hisobida zafar quchishga sabab bo‘ldi.

Shuningdek, Global Ramblers jamoasi 5:1, Isroil terma jamoasi 4,5:1,5 hisobida mag‘lub etilgan bo‘lsa, Malcolm’s Mates va Hexamind jamoalari bilan 3:3 hisobida jangovar durang o‘ynashdi. Hexamind tarkibida taniqli grossmeysterlarga qarshi o‘yinda Javohir Sindarov amaldagi jahon chempioni Volodar Murzin, Nodirbek Abdusattorov esa Levon Aronyanni mag‘lub etdi. Rustam Qosimjonov va Shamsiddin Vohidov partiyalarini durang bilan yakunladi. Afsuski, Afruza Hamdamova va Nilufarxon Imomquzieva o‘z raqiblariga imkoniyatni boy berdi.

Rapid yo‘nalishidagi bahslar yakunida O‘zbekiston terma jamoasi 7 g‘alaba, 3 durang va 2 mag‘lubiyat bilan 17 ochko to‘pladi va qo‘shimcha ko‘rsatkichlarga ko‘ra 4-o‘rinni egalladi. Xuddi shuncha ochko to‘plagan Freedom jamoasi qo‘shimcha koeffisiyentlar orqali bronza medallarini qo‘lga kiritdi. Team MGD1 jamoasi 21 ochko bilan jahon chempionligini qo‘lga kiritdi, Hexamind Chess Team esa 20 ochko bilan kumush medal sohibiga aylandi.

O‘zbekiston terma jamoasi rapid yo‘nalishidagi ishtirok uchun 30 000 yevro miqdorida mukofot puli bilan taqdirlandi.

Blis yo‘nalishida O‘zbekiston terma jamoasi saralash bosqichida barcha 12 uchrashuvda g‘alaba qozonib, 24 ochko bilan C guruhi g‘olibi sifatida pley-offga yo‘l oldi. 1/8 finalda D guruhining 4-o‘rindagi Qozog‘istonning Barys.kz jamoasiga qarshi ikki bahsda ham ustunlik qayd etilib, chorak final yo‘llanmasi qo‘lga kiritildi.

Chorak finalda Nihal Sarin boshchiligidagi Isroilning Ashod Elit Chess Club jamoasiga qarshi bahslarda 3:3 va 5:1 hisobida g‘alaba qozonildi.

Yarim finalda Aleksandr Grishuk yetakchilik qilgan Qozog‘istonning KazChess jamoasiga qarshi bahsda birinchi o‘yin 3:3 hisobida durang bilan yakunlandi, ikkinchi o‘yinda esa qo‘shni jamoa 4:2 hisobida ustun keldi va final yo‘llanmasini qo‘lga kiritdi.

Uchinchi o‘rin uchun bellashuvda Hexamind jamoasiga har ikkala uchrashuvda ham 2,5:3,5 hisobida imkoniyat boy berildi. Natijada O‘zbekiston terma jamoasi yana 4-o‘rin bilan kifoyalandi.

Shu tariqa, O‘zbekiston terma jamoasi rapid va blis yo‘nalishlaridagi Jahon chempionatini 4-o‘rinda yakunladi. Rapid bahslari uchun 30 ming, blis yo‘nalishi uchun esa 50 ming yevro mukofot puli ishlab topildi. Umumiy mukofot puli 80 ming yevroni tashkil etdi.

Finalda KazChess jamoasini mag‘lub etgan WR Chess Team blis bo‘yicha jahon chempionligini saqlab qoldi.