O‘zbekistonda “Seysmik xavfsizlik sohasi a’lochisi” ko‘krak nishoni ta’sis etildi

Vazirlar Mahkamasining qarori bilan “Seysmik xavfsizlik sohasi a’lochisi” ko‘krak nishoni ta’sis etildi.

Mazkur ko‘krak nishoni bilan seysmologiya, inshootlarning seysmik mustahkamligi, aholi va hududlarning seysmik xavfsizligini ta’minlash sohasini rivojlantirishga munosib hissa qo‘shgan fuqarolar taqdirlanadi.

Ko‘krak nishoni bilan taqdirlash bo‘yicha takliflar har yili 15 sentyabrga qadar Fanlar akademiyasiga taqdim etiladi. Bunda nomzodlarni tanlashda quyidagilar inobatga olinadi:

• seysmik xavfsizlikni ta’minlash sohasidagi davlat siyosatining asosiy yo‘nalishlarini va davlat dasturlarini ishlab chiqishda ishtirok etgani;
• seysmologiya, inshootlarning seymik mustahkamligi, aholi va hududlarning seysmik xavfsizligini ta’minlash sohasini rivojlantirishga hissa qo‘shgani;
• seysmik xavfsizlik sohasida zamonaviy axborot texnologiyalari va innovasion texnologiyalarni keng joriy etishda ishtirok etgani;
• kuchli zilzilalar oqibatini bartaraf etishda ishtirok etgani;
• bino va inshootlarning seysmik mustahkamligini tadqiq qilish, ularning seysmik zaifligini baholash hamda tegishli xulosalar berishda ishtirok etgani;
• seysmik xavfsizlikni ta’minlash sohasida monografiya, darslik va o‘quv qo‘llanmalar chop etgani;
• suv omborlari to‘g‘onalari, ekspluatasiya qilinayotgan neft va gaz konlari hududlarida seysmiklikning namoyon bo‘lishini muntazam baholab borish va boshqalar.

Ko‘krak nishoni va uning guvohnomasi har yili 13-oktyabr – Tabiiy ofatlar xatarini kamaytirish xalqaro kuni arafasida Fanlar akademiyasi prezidenti (yoki uning topshirig‘iga muvofiq boshqa mas’ul shaxslar) tomonidan tantanali tarzda topshiriladi.

Ko‘krak nishoni bilan taqdirlanganlarga BHMning 4 baravari miqdorida pul mukofoti beriladi.

Hujjat Qonun hujjatlari ma’lumotlari milliy bazasida e’lon qilingan va 2023 yil 14 sentyabrdan kuchga kirdi.