O‘ta o‘ng “Germaniya uchun muqobil” (AfD) partiyasi ijtimoiy so‘rovnomada birinchi marta yetakchilikka chiqdi

O‘ta o‘ng “Germaniya uchun muqobil” (AfD) partiyasi ijtimoiy so‘rovnomada birinchi marta yetakchilikka chiqdi. Bu haqda DW xabar berdi.

Ipsos instituti o‘tkazgan so‘rovnomaga ko‘ra, 23 fevralda Germaniyada bo‘lib o‘tgan parlament saylovlarida g‘alaba qozongan XDI/XSI konservativ blokini qo‘llab-quvvatlash dadajasi besh foizga pasayib, 24 foizni tashkil etdi, o‘ng qanot populistik “Germaniya uchun muqobil” (AfD) partiyasi esa uch punktga ko‘tarilib, 25 foizga yetdi.

Ushbu so‘rovnoma natijalariga ko‘ra, lavozimidan ketayotgan kansler Olaf Sholsning Germaniya sosial-demokratlar partiyasini (GSDP) qo‘llab-quvvatlash 15 foiz darajasida o‘zgarishsiz qoldi.

AdD yetakchisi Alis Vaydel o‘z partiyasining so‘rovnomalardagi muvaffaqiyatini olqishladi.

"Odamlar XDI/XSI va GSDP koalisiyasining odatdagidek faoliyat yuritishini emas, balki siyosiy o‘zgarishlarni xohlaydi", – deb yozdi Vaydel X ijtimoiy tarmog‘ida.

Avvalroq XDI/XSI va GSDP koalisiya muzokaralari yakunlanganini e’lon qilgan edi. Konservatorlar yetakchisi Fridrix Mersning Germaniyaning yangi kansleri bo‘lishi deyarli aniq. Muzokaralar davomida ikkala siyosiy kuch ham soliq va immigrasiya kabi ba’zi asosiy masalalar bo‘yicha murosaga kelishga majbur bo‘ldi. Kuzatuvchilarning ta’kidlashicha, bu ularning reytingiga ta’sir ko‘rsatgan.