«Uchta qizi yoki uchta singlisiga yaxshilik qilgan odam jannatga kiradi»

Avvalgi hadislarda qiz farzandlar zikr qilingan bo‘lsa, bu hadis singillarni tarbiyalash haqida kelgan. Ya’ni ota-ona yo‘q bo‘lgan chog‘da ularning o‘rnini bosishning fazli haqida so‘z yuritilgan.

79. Abu Sa’id Xudriydan rivoyat qilinadi:

«Rasululloh sollallohu alayhi vasallam: «Uchta qizi yoki uchta singlisi bo‘lib, ularga yaxshilik qilgan odam albatta jannatga kiradi», dedilar».

Sharh: Hayotda nimalar bo‘lmaydi, deysiz. Gohida opa-singillar aka-ukalarning qaramog‘ida qolishi ham bor. Ota bor bo‘lsa, u mas’ul bo‘lar edi. Ammo otasi yo‘q ayol zoti qarovsiz qoladi, degan gap Islomda yo‘q. Ota bo‘lmagan chog‘da aka yoki uka opa-singilni qaramog‘iga olishi shariat hukmi bo‘yicha sobit bo‘ladi. Lekin bu gap opa-singillar aka-ukalarning muruvvatiga muhtoj bo‘lib qoladi, degani emas. Chunki bu imkoniyat aka yoki ukasidan boshqa boquvchisi, qarovchisi bo‘lmagan opa-singilga Alloh taolo tomonidan berilgan haqdir. Aka-uka bu mas’uliyatdan qochishi mumkin emas. Agar ular nomardlik qilib, bu mas’uliyatdan qochadigan bo‘lsalar, jamiyat qonun kuchini ishga solib, opa-singillarning haqlarini olib beradi.

Ushbu hadisdan olinadigan foydalar:

1. Uch qiziga yaxshilik qilgan odam jannatga kirishi.

2. Uch singlisiga yaxshilik qilgan odam jannatga kirishi.

Manba: islom.uz