Tramp tufayli dollar minimal darajaga tushdi

AQSh valyutasi mart oyida keskin pasayib, 2022-yil noyabridan beri eng katta oylik pasayishini qayd etdi. Savdo hamkorlarining javob choralarini qo‘llashi va jahon iqtisodiyotini beqarorlashtirishi mumkin bo‘lgan AQShning yangi tariflari haqidagi xavotirlar tufayli dollar indeksi taxminan 3,5 foizga yo‘qotdi.

Bu shunchaki savdo mojarolari emas, deydi SPI Asset Management kompaniyasining boshqaruvchi hamkori Stiven Innes: “Bu omillarning kombinasiyasi – iste’molchilarning xatti-harakatlarini o‘zgartirish, investisiyalarni sekinlashtirish va o‘jar inflyasiya”.

Shu fonda funt sterling dollarga nisbatan 3 foizga mustahkamlanib, 1,2760 dollarga yetdi, yevro esa 4,4 foizga oshib, 1,083 dollarni tashkil qildi.

Dollar va umuman jahon bozorining tushishiga asosiy sabab Donald Trampning AQShga importga yangi bojlar joriy etish haqidagi bayonotlaridir. Prezident tariflar nafaqat Amerika bilan eng noqulay savdo balansiga ega bo‘lgan mamlakatlarga emas, balki barcha mamlakatlarga ta’sir qilishini aniq aytdi.

Ushbu so‘zlardan so‘ng Osiyo-Tinch okeani mintaqasidagi indekslar qulab tushdi: Yaponiyaning Nikkei 4%, Janubiy Koreyaning Kospi 3% yo‘qotdi. Sotish to‘lqini Yevropaga ham tarqaldi, Britaniyaning FTSE 100 ko‘rsatkichlari 0,9 foizga, Germaniyaning DAX va Fransiyaning CAC ko‘rsatkichlari esa 1 foizdan ko‘proqqa tushdi.

"Investorlar nafaqat joriy qilingan tariflardan, balki chorshanba kuni e’lon qilinadigan yangi e’lonlardan ham ehtiyot bo‘lishadi", dedi CMC Markets bosh tahlilchisi Yoxen Stanzl.

Sarmoyadorlar yangi savdo zarbalari oldidan xavfsiz boshpana izlayotgani sababli oltin narxi bir unsiya uchun rekord darajadagi 3128 dollarga ko‘tarildi.

The Guardian tomonidan so‘ralgan iqtisodchilar kompaniyalar xarajatlarni iste’molchilarga o‘tkazishi sababli tariflar AQShda inflyasiyani tezlashtirishidan qo‘rqishadi. Allaqachon e’lon qilingan ma’lumotlar shuni ko‘rsatdiki, amerikaliklarning iqtisodiyotga bo‘lgan ishonchi 2022 yildan beri eng past darajaga tushib, Uoll-strit aksiyalari narxi tushib ketdi.

Goldman Sachs AQShning keyingi 12 oy ichida resessiya ehtimolini 20 foizdan 35 foizga oshirib, inqiroz yuz bergan taqdirda S&P 500 indeksi o‘zining eng yuqori cho‘qqisidan 25 foizga tushishi mumkinligini taxmin qildi.