Toshkentda ilk bor BMTning Kosmosdan tinch maqsadlarda foydalanish qo‘mitasining simulyasiyasi o‘tkazildi

Joriy yilning 9 fevral kuni «O‘zbekkosmos» agentligi Toshkent shahridagi Xalqaro Vestminster universiteti qoshidagi akademik lisey bilan hamkorlikda BMTning Kosmosdan tinch maqsadlarda foydalanish qo‘mitasining simulyasiyasini o‘tkazdi.

Mazkur tadbirdan ko‘zlangan asosiy maqsad – yoshlarni koinotdan tinch maqsadlarda foydalanish va tadqiq qilish mavzusiga jalb qilishdan iborat bo‘ldi.

Tadbirda oliy va o‘rta ta’lim muassasalaridan 40 dan ortiq talabalar ishtirok etdi.

Tadbir ishtirokchilari koinotdan tinch maqsadlarda foydalanish va tadqiq qilishda xalqaro hamkorlikning o‘rni, Marsni barqaror mustamlaka qilish chora-tadbirlari, barqaror rivojlanish maqsadlariga erishishda kosmik tadqiqotlar va texnologiyalarning roli va boshqa ko‘plab mavzularni muhokama qildilar.

Ta’kidlash joizki, bu O‘zbekistonda kosmik mavzularga bag‘ishlangan ilk BMT Modeli simulyasiyasi hisoblanadi.