Toshkentda IFADning Markaziy Osiyoda yagona vakolatxonasi ish boshladi

Bosh ofisi Italiyaning Rim shahrida joylashgan Qishloq xo‘jaligini rivojlantirish xalqaro jamg‘armasi (IFAD) O‘zbekistonda o‘z vakolatxonasini ochdi.

O‘zbekiston jamg‘armaga 2011 yilda a’zo davlat sifatida qo‘shilgan. Mutaxassislar ushbu vakolatxonaning O‘zbekistonda ochilishi Qishloq xo‘jaligini rivojlantirish xalqaro jamg‘armasining mamlakatdagi qishloq hududlarini rivojlantirish jarayonini qo‘llab-quvvatlash borasidagi uzoq muddatli sa’y-harakatlarida muhim yutuq ekanini ta’kidladi.

Toshkentdagi yangi vakolatxonaning ochilishida IFAD prezidenti Alvaro Lario, mamlakatimiz qishloq xo‘jaligi vaziri Ibrohim Abdurahmonov ishtirok etdi. Janob Lario Qishloq xo‘jaligini rivojlantirish xalqaro jamg‘armasining Markaziy Osiyodagi ilk vakolatxonasini ochishda ko‘rsatgan ko‘magi uchun O‘zbekiston Prezidenti hamda mamlakat hukumatiga o‘z minnatdorligini izhor etdi.

– Qishloq xo‘jaligini rivojlantirish xalqaro jamg‘armasining Toshkentdagi vakolatxonasi ish boshlashi kelgusida sohada mustahkam hamkorlikdan dalolatdir, – deydi IFAD prezidenti A.Lario. – IFAD jamg‘armasi O‘zbekiston va mintaqadagi barqaror rivojlanish jarayonlarini qo‘llab-quvvatlashga tayyor. Hukumat va xususiy sektor bilan bo‘lgan sherikligimiz orqali biz iqlim o‘zgarishiga moslashish va qishloq hududlarining gullab-yashnashiga kiritiladigan keng ko‘lamli sarmoyalarni rag‘batlantirishimiz mumkin.

Yangi vakolatxonaning ochilishi bilan IFAD O‘zbekiston qishloq xo‘jaligi tarmog‘ining ehtiyoj va muammolarini samaraliroq qamrab olish va hal etish imkoniyatiga ega bo‘ladi. Vakolatxona mintaqaning boshqa mamlakatlari uchun namuna bo‘lib, barqarorlik va inklyuzivlikka xizmat qiladigan hamda iqlim o‘zgarishi va atrof-muhit muhofazasi masalalariga nisbatan rasional yondashuvni ta’minlaydigan barqaror rivojlanish amaliyotlarining samaraliroq joriy etilishi uchun mahalliy darajada faoliyat yuritishning muhimligini ta’kidlaydi.

– Ushbu vakolatxonaning ochilishi ikkala tomonning qishloq hududlarini rivojlantirish hamda dehqon xo‘jaliklarining huquq va imkoniyatlarini kengaytirishga bo‘lgan sadoqatini namoyish etadi, – deydi qishloq xo‘jaligi vaziri I.Abdurahmonov. – Bu hamkorlik nafaqat O‘zbekistonga foyda keltirishi, balki mintaqadagi boshqa davlatlar uchun ham ijobiy o‘rnak bo‘lishi mumkin.

IFAD jamg‘armasi mojarolar, iqlim o‘zgarishi va inflyasiya kabi global va mintaqaviy muammolarga qaramay, O‘zbekiston agrotarmog‘i imkoniyatlarini kengaytirishga intilmoqda. Jamg‘armaning O‘zbekiston bilan yaqin sherikligi natijasida oxirgi o‘n yilda loyihalar portfeli sezilarli darajada kengayib, Markaziy Osiyodagi eng yirik to‘plamga aylandi. Loyihalar qiymati 435,3 million AQSh dollariga yetib, 550 ming nafar qishloq aholisi qamrab olindi.

IFADning bog‘dorchilik va sut mahsulotlarini ishlab chiqarish tarmoqlaridagi ta’minot zanjirlarini qo‘llab-quvvatlashdagi yetakchiligi mazkur yo‘nalishlarga xususiy sektor va rivojlanish sohasidagi sheriklar tomonidan sarmoya kiritishni jadallashtirishning hal qiluvchi omili bo‘ldi.

Jamg‘armaning O‘zbekiston uchun mo‘ljallangan strategik rejasi (2023-2027 yillar uchun) IFADning dehqon xo‘jaliklari va qishloq xo‘jaligi diversifikasiyasiga sarmoya kiritishga nisbatan bo‘lgan novatorlik yondashuviga asoslanadi. Dastur doirasida Qishloq xo‘jaligini rivojlantirish xalqaro jamg‘armasi va O‘zbekiston hukumati milliy va xalqaro qo‘shma moliyalashtirishni o‘z ichiga olgan qiymati 250 million AQSh dollariga teng bo‘lgan ishchi dasturni amalga oshirish niyatida.