Toshkent shahrida yoshlarning 16651 ta muammosi aniqlandi

O‘zbekiston Respublikasi Prezidentining 2018 yil 27 iyundagi “Yoshlar – kelajagimiz” Davlat dasturi ijrosini ta’minlash maqsadida 22 iyul kuni Toshkent shahridagi Mirzo Ulug‘bek istirohat bog‘ida Innovasion rivojlanish vaziri Ibrohim Abdurahmonov hamda Toshkent shahrining Mirzo Ulug‘bek tumani hokimi Shavkatbek Ergashev tumandagi yoshlar bilan uchrashib, ularni qiynayotgan muammolarni tingladilar, savollariga batafsil javob berdilar.

Tadbirga kelgan yoshlarning aksariyatida ma’lum tadbirkorlik faoliyatini olib borish uchun g‘oyalari, o‘ylab qo‘ygan rejalari bo‘lib, ular ishlarini boshlab olishlari uchun kreditlar, joy olishda qiyinchiliklarga duch kelayotganlarini aytishdi. Ularga “Yoshlar – kelajagimiz” Davlat dasturiga asosan biznes tashabbuslar, startaplar, g‘oyalar va loyihalarni amalga oshirish uchun tijorat banklari orqali yillik 7 foiz stavka bilan imtiyozli kredit va mol-mulkni lizingga berish yo‘lga qo‘yilgani tushuntirildi. Shuningdek, uchrashuvda qatnashgan bank mutaxassislariga yoshlarning kredit olishlari va ulardan to‘g‘ri foydalanishlarini ta’minlash maqsadida biznes-reja tuzishlarida amaliy yordam berishi haqida ko‘rsatma berildi.

Uchrashuvga nafaqat yoshlar balki, ayrim yoshlarning onalari ham keldiki, ular farzandlariga doir muammolarni hal qilishlarini so‘rashdi. Onalarni qiynayotgan masala bu kollej, liseylarda, maktablarning yuqori sinflarida o‘qiydigan farzandlarini ishga joylashtirish, uy-joy masalalari bo‘ldi. Shuningdek, yoshlarni harbiy xizmatga jo‘natish masalasi ham ko‘tarildi. Farzandini uch yildan beri muddatli harbiy xizmatga jo‘natishlariga erisha olmagan onaning murojaati yozib olinib, tez kunlarda o‘rganib chiqilishi aytildi.

Bundan tashqari, uchrashuvda tayyor dasturiy loyihalari bor yoshlar guruhi ham o‘z ishlanmalarini namoyish etdi. Ular vazirlikka taklif etilib, loyihani amalga oshirishda bevosita ko‘mak berilishiga kelishildi.

Hozir Toshkent shahrining 11 tumanida tuman shtablari hamda umumlashtiruvchi shahar shtabi tashkil etilgan bo‘lib, barcha shtablarda Innovasion rivojlanish vazirligining 11 nafar mas’ul xodimlari biriktirilgan. Mazkur shtablarda tumanlardagi mutasaddi idora va korxonalar mas’ul xodimlari navbatchiligi tashkil etilgan bo‘lib, har kuni ertalab soat 8-00 dan kechki payt 22-00 ga qadar ular ishtirokida shtabga kelib tushayotgan murojaatlar o‘rganilib, tegishli tartibda hal etish ishlari amalga oshirilmoqda.

Har bir tumanda mahallalar sonidan kelib chiqib tegishli mutasaddi 1476 nafar xodimlardan iborat 4 tadan 18 tagacha jami 144 ta ishchi guruh faoliyat yuritmoqda.

20 iyul holatiga Toshkent shahridagi jami 494 ta mahalladan 72 tasi to‘liq o‘rganib chiqildi, qolgan mahallalarda o‘rganish ishlari davom etmoqda. Mahalladagi o‘rganishlar natijasida jami 39308 ta xonadonga uyma-uy kirib chiqilgan bo‘lib, 1166 ta muammolar aniqlangan.

Toshkent shahar bo‘yicha jami 47081 nafar yoshlar bilan muloqot qilingan bo‘lib, ulardan 16651 yechimini kutayotgan muammolar borligi aniqlandi. Shundan 1123 nafari ijobiy hal etildi. 15528 murojaat o‘rganish jarayonida.

Manba: xs.uz