Termiz hokimligi o‘zini yoqib yuborgan erkak to‘g‘risidagi maqolalarga raddiya bildirmoqda

Surxondaryolik erkakning Termiz hokimiyati binosi oldida o‘zini yoqib yuborganligi holati hamon qizg‘in muhokamalar ostida.

Surxondaryo viloyati hokimligi DARYO.UZ saytidagi Surxondaryoda o‘zini-o‘zi yoqib yuborgan fuqaro bo‘yicha ma’lumot va KUN.UZ saytidagi Termiz tuman hokimligi hovlisidagi voqea bo‘yicha rasmiy ma’lumot sarlavhali maqolalar yuzasidan RADDIYa bildirmoqda. Raddiya 2 mart kuni Surxondaryo viloyati hokimligining feysbukdagi Surxondaryo viloyati hokimligi Bahodir Po‘latov sahifasida keltirilmoqda.

2019 yil 25 fevral kuni soat taxminan 11:20 larda Termiz tumani, Uchqizil mahallasi At-Termiziy ko‘chasi markazida Termiz tumani Yangihayot mahallasida yashovchi, 1979 yil 7 iyun kuni tug‘ilgan, fuqaro Erdanov Baxtiyar Yusupovich o‘zi bilan olib yurgan 0.5 litr hajmdagi 1 dona polietilen idishda bo‘lgan benzin yoqilg‘isini ustiga sepib, qo‘lida bo‘lgan zajigalka yondirg‘ich orqali olov berib o‘zini yoqib yuborgan.

Fuqaro B.Erdanov butun tanani 15-20 % qismini I-II darajali alangadan termik kuyishi, O‘RTACHA og‘irlikdagi tan jarohati deb baholanganligi ko‘rsatilgan.

Ijtimoiy tarmoqdagi habarlarga ko‘ra, fuqaro Erdanov Baxtiyarning kreditga olingan pullar evaziga ochgan kafesi joylashgan bino buzib tashlangani, bu masalada bir necha oydan buyon tuman hokimligiga murojaat qilgani, biroq qabulga kira olmagani bayon etilgan.

Vaholangki, Erdanov Baxtiyor yoki oila a’zolari tadbirkorlik faoliyatini amalga oshirish uchun yakka tartibdagi tadbirkor sifatida davlat ro‘yxatidan o‘tmagan. Qolaversa, hech qanaqa kafe ko‘rinishidagi bino va inshooti ko‘chmas mulk sifatida mavjud bo‘lmagan.

Uning faoliyati qo‘lbola tayyorlangan yengil konstruksiyali kichik xonada sanitariya va gigiyena talablariga zid tarzda pirojki pishirib sotish bo‘lgan. Aynan shu yengil konstruksiyali kichik xona o‘zboshimchalik bilan qurilib faoliyat olib borilgani uchun tuman mutasaddilari tomonidan bartaraf etilgan.

Shu kabi, Erdanov Baxtiyar bilan suhbatlashilganda, u o‘z ko‘rsatmasida, 2018 yil avgust oyida turmush o‘rtog‘i savdo uchun 15 mln so‘m kredit olganligi, kreditni qisman to‘lab, 9 mln 545 ming so‘m qarz bo‘lib qolgani, ushbu kreditni to‘lovini to‘lamasdan Tojikiston Respublikasiga 4 oyga ketib qolganligi, ushbu harakatlarni siqilishi natijasida sodir etganligini, o‘ziga o‘t qo‘ygan vaqtida katta o‘g‘liga telefon orqali video tasvirga yozib olishni aytganligi, u muqaddam tumanda qo‘l bola perashki tayyorlab sotganligini, biroq tadbirkor emasligini bayon etgan.

Bundan tashqari, Erdonov Baxtiyorning ushbu masalada bir necha oydan buyon tuman hokimligi murojaat qilgani, tuman hokimi qabuliga kira olmagani holati haqidagi vajlar bo‘yicha viloyat hokimligi tomonidan xizmat tekshiruvi tayinlangan va natijalari haqida qo‘shimcha xabar beriladi deyiladi viloyat hokimligi matbuot xizmatining izohida.