Tarixda birinchi marta Mustaqil Davlatlar Hamdo‘stligi o‘yinlari o‘tkaziladi
Bugun Rossiya Federasiyasining Qozon shahrida I Mustaqil Davlatlar Hamdo‘stligi o‘yinlarini o‘tkazish masalalariga bag‘ishlangan videokonferensiya o‘tkazildi.
Bu haqda Jismoniy tarbiya va sport vazirligi axborot xizmati xabar berdi. Unda vazirning birinchi o‘rinbosari Ravshan Ermatov hamda vazirlik vakillari qatnashdi.
Hozirda butun dunyoda koronavirus pandemiyasi sababli sport o‘yinlarini o‘tkazishda muammolar tug‘ilmoqda. Rossiya Federasiyasidagi mavjud sanitariya-epidemiologik vaziyat tufayli ayni paytda ilk marotaba tashkil etilayotgan sport o‘yinlarini 2020 yil 4 sentyabrdan 11 sentyabrgacha o‘tkazish imkoniyati ko‘rib chiqilmoqda.
Videokonferensiyada sport o‘yinlarini o‘tkazish tartibi, xavfsizlik choralari, tibbiy yordam ko‘rsatish masalalari muhokama etildi.
Ta’kidlash joiz, I Mustaqil Davlatlar Hamdo‘stligi o‘yinlarida sportning 22 turi bo‘yicha bellashuvlar o‘tkaziladi. Boks, sohil voleyboli, stol tennisi, badiiy gimnastika, suv polosi shular jumlasidan. Sportchilar bellashuvlarda 284 ta medallar jamlanmasi uchun kurash olib borishadi.
