Saraton o‘smalarini bartaraf etishning samarali usuli topildi

Tel-Aviv universiteti olimlari CRISPR texnologiyasidan birinchi marta bosh va bo‘yin saraton hujayralaridan genni olib tashlash uchun foydalanishdi, natijada hayvonlarda o‘smalarning 50 foizi butunlay yo‘q bo‘lib ketdi.

Advanced Science jurnalida chop etilgan tadqiqot saraton kasalligi uchun gen terapiyasining yangi istiqbollarini ochadi.

Shu paytgacha bitta genni olib tashlash o‘sma tuzilmasini yo‘q qilishga qodir emas deb hisoblar edi. Biroq, tadqiqotchilar ba’zi genlar saraton hujayralarining omon qolishi uchun juda muhim ekanligini ko‘rsatdi, bu ularni CRISPR terapiyasi uchun ideal nishonga aylantiradi. Mutaxassislar tadqiqot davomida bosh va bo‘yin o‘smalari rivojlanishida asosiy rol o‘ynaydigan SOX2 geniga e’tibor qaratishdi.

CRISPR mexanizmini aniq yetkazib berish uchun olimlar RNK ko‘rinishidagi genetik muharrirni o‘z ichiga olgan maxsus nanozarrachalarni ishlab chiqishdi. Zarrachalar EGF oqsiliga yo‘naltirilgan antitanachalar bilan qoplangan bo‘lib, CRISPR tizimini ta’sirlangan to‘qimalarga maksimal aniqlik bilan yo‘naltirishga imkon berdi. Dori vositasi bir haftalik interval bilan uch marta to‘g‘ridan-to‘g‘ri o‘smaga yuborildi. 84 kundan keyin o‘smalarning yarmi butunlay yo‘q bo‘lib ketdi.

Tadqiqotchilar endi terapiya samaradorligini oshirish uchun qo‘shimcha genlarni olib tashlash talab etiladimi degan masalaga oydinlik kiritmoqchi. Ularning aytishicha, bu usul o‘smalarni genetik darajada kimyoterapiyasiz yo‘q qilishga qaratilgan yangi davolash usullariga yo‘l ochishi mumkin. Ilgari olimlar saraton o‘smalarida genlarni o‘chirib qo‘yish metastazning oldini olishini ham aniqlagan edi, deb xabar beradi lenta.ru.