Rossiya Zaporoje AESni o‘z elektr tarmoqlariga ulash uchun elektr uzatish liniyasini qurmoqda — OAV

Bu haqda New York Times nashri Greenpeace tashkiloti hisobotiga tayanib xabar bermoqda.

Oxirgi uch oy ichida Rossiya Azov dengizi bo‘ylab Mariupol va Berdyansk shaharlari o‘rtasida taxminan 80 km elektr uzatish liniyasini qurdi, deb yozadi nashr. Bu haqda Greenpeace tomonidan qo‘lga kiritilgan sun’iy yo‘ldosh tasvirlari orqali ma’lum bo‘ldi. Elektr uzatish liniyasining bu qismi Mariupol yaqinidagi elektr podstansiyasiga olib boradi, ushbu podstansiya esa Zaporoje AES bilan bog‘langan. AES podstansiyadan taxminan 220 km g‘arbda joylashgan.

Greenpeace tahlilchisi Shon Bernining fikricha, bu — Rossiya AESni qayta ishga tushirish va uni o‘z manfaati yo‘lida foydalanishni rejalashtirayotganini ko‘rsatuvchi ilk jiddiy dalil hisoblanadi. AES Rossiyaning Rostov viloyati energetika tizimiga ulanishi mumkin.

The New York Times nashrining yozishicha, bu tarixda ilk marta bir davlat urush natijasida boshqa davlatdan tortib olgan yadroviy inshootni o‘z foydasi uchun ishlatishi bo‘lishi mumkin.

Avvalroq Tramp ma’muriyati Ukraina bilan Zaporoje AESni AQSh nazoratiga o‘tkazish masalasini tinchlik kelishuvi doirasida muhokama qilgan, biroq Kiyev bu taklifni rad etgan edi. Rossiya esa 2022 yil mart oyidan buyon Zaporojye AES va u joylashgan Energodar shahrini nazorat qilib kelmoqda.