AQSH: "Rossiya Ukrainaga shafqatsiz zarbalar berishi kutilmoqda"

Qo‘shma Shtatlar Rossiya strategik aviasiya samolyotlarining yo‘q qilinishiga javoban Ukrainani kengroq o‘qqa tutilishini istisno etmayapti; SBU infratuzilmasi hujumga uchrashi mumkin.

Bu haqda Reuters agentligi Amerika rasmiylariga tayanib yozmoqda.

Ularning hisob-kitoblariga ko‘ra, Rossiya o‘tgan hafta oxirida sodir bo‘lgan dron hujumiga hozircha to‘liq javob bermagan. Ta’kidlanishicha, Kreml yaqin orada keng ko‘lamli ko‘p vektorli zarba tayyorlamoqda.

Agentlik manbalaridan biri hujumning aniq vaqti noma’lumligini, biroq bu yaqin kunlarda sodir bo‘lishi mumkinligini ta’kidladi. Boshqa bir rasmiyning ta’kidlashicha, javob turli xil havo hujumlari vositalarini, jumladan, raketalar va dronlarni o‘z ichiga oladi.

Boshqa bir manba ta’kidlaganidek, bu Moskvaning "assimetrik" javobi haqida. Ya’ni, uni SBU dronlarining Rossiya samolyotlariga bergan zarbasi bilan taqqoslab bo‘lmaydi. G‘arb diplomatlaridan biri Rossiya Kiyevga aniq signal berish uchun ramziy nishonlarga, xususan hukumat binolariga navbatdagi zarbalar berishini ta’kidladi.

Yana bir yuqori martabali diplomat hujum "ommaviy, shafqatsiz va barqaror" bo‘lishini kutmoqda. Rossiya va Ukrainaning Vashingtondagi elchixonalari, shuningdek, Oq uy agentlikka bu borada izoh berishdan bosh tortdi.

Eslatib o‘tamiz, 1 iyun kuni Rossiya Mudofaa vazirligi Ukrainaning FPV uchuvchisiz uchoqlari Murmansk, Irkutsk, Ivanovo, Ryazan va Amur viloyatlaridagi ayerodromlarga hujum qilgani haqida xabar bergan edi.

Bu Rossiya hududidagi harbiy infratuzilmaga qilingan eng yirik hujum edi.