Qirg‘izistonda “Alibaba”ning filiali ochilishi mumkin
Qirg‘iziston savdo-iqtisodiy hamkorlikni kengaytirish maqsadida Xitoyga Alibaba Group kompaniyasining respublikada vakolatxonasini ochishni taklif qildi. Bu haqda Qirg‘iziston hukumati matbuot xizmati ma’lum qildi.
"Savdo-iqtisodiy hamkorlik bo‘yicha Qirg‘iziston-Xitoy hukumatlararo komissiyasining 15-majlisi video selektor ko‘rinishida bo‘lib o‘tdi. Iqtisodiy o‘sishni, internet-tijoratni rag‘batlantirish va o‘zaro savdo aylanmasini oshirish uchun Qirg‘iziston tomoni respublikada Alibaba Group filialini ochish imkoniyatini ko‘rib chiqishni taklif qildi”, — deyiladi xabarda.
Yig‘ilishda Qirg‘iziston delegasiyasiga Bosh vazirning birinchi o‘rinbosari Adilbek Qosimaliyev boshchilik qildi va u koronavirus pandemiyasiga qaramay, tomonlar iqtisodiyot, savdo, standartlashtirish, qishloq xo‘jaligi, sog‘liqni saqlash, favqulodda vaziyatlar, intellektual mulk, matbuot, transport sohalarida hamkorlikni rivojlantirishda ijobiy natijalarga erishganini ta’kidladi.
“Uchrashuvda, infratuzilma va irrigasiya loyihalarini amalga oshirishga, xususan, Chuy kanalini qurishga,“Xitoy-Qirg‘iziston-O‘zbekiston” temir yo‘li qurilishiga, “Shimol-Janub” muqobil yo‘li, beshta muhandislik inshoati (ikkita qor ko‘chkisi galereyasi, uchta yo‘l o‘tkazgich ko‘prigi) qurilishi, shuningdek, Bishkek shahridagi yo‘llarni rekonstruksiya qilishga alohida e’tibor qaratildi, — deyiladi xabarda.
Xitoy Xalq Respublikasi Savdo vaziri o‘rinbosari Van Shouven, o‘z navbatida, Xitoy Qirg‘izistondan mahsulotlar, jumladan, qishloq xo‘jaligi mahsulotlari importini ko‘paytirishga harakat qilayotganini aytdi. “U innovasiyalar, yashil iqtisodiyot va gidroyenergetika, tog‘-kon sanoati va neftni qayta ishlash, atrof-muhitni muhofaza qilish, sarmoyaviy va mintaqalararo hamkorlik sohalarida ikki tomonlama hamkorlikka alohida e’tibor qaratishni taklif qildi”, — deya qo‘shimcha qildi respublika matbuot xizmati.
