“Paxtakor” o‘z maydonida yengildi
OFK Chempionlar ligasining guruh bosqichi birinchi turida “Paxtakor” jamoasi BAAning “Al-Ayn” klubini qabul qildi.
“A” guruhidan o‘rin olgan mazkur bahs “Bunyodkor” stadionida o‘tkazildi. Uchrashuvning 11 - daqiqasida "Al-Ayn" jamoasi a’zosi Kojolo Laba hisobni ochgan bo‘lsa, 25-daqiqada Doston Tursunovning xatosidan muvaffaqiyatli foydalangan Holid Al Balushi hisobni 0:2 ko‘rinishiga olib keldi.
Ikkinchi bo‘limda “Paxtakor” jamoasi o‘yinni o‘z qo‘liga olmoqchi bo‘ldi, biroq futbolchilarning o‘yini qovushmadi. Oqibatda 67-daqiqada Kojolo Laba o‘z hisobiga yana bir gol yozib qo‘ydi.
O‘yin yakuniga qadar jamoalar bir necha hujumlarni uyushtirgan bo‘lsa -da, hisob o‘zgarmadi.
Shu tariqa, “Paxtakor” va “Al-Ayn” uchrashuvi 0:3 hisobida yakunlandi.
